BUNDA LITERASI NGALUNCURKEUN PROGRAM JELITA SMPN 1 KOTA SUKABUMI

Reporter : ARIF HIDAYAT

Redaktur/Editor : ENDANG SUMARDI

Bunda Literasi Kota Sukabumi, Hj. Fitri Hayati Fahmi, S.Ag., M.M.Pd., ngaluncurkeun program Jelita (Jendela Literasi Kita) SMPN 1 Kota Sukabumi, cindekna tanggal 4 Novémber 2019. Hadir dina kasempetan éta, Kapala Dispusip (Dines Perpustakaan jeung Kaarsipan) Kota Sukabumi, Nicke Siti Rahayu, S.H., M.H. katut réngréngannana, sarta para tamu ondangan séjénna.

Dina biantarana Bunda Literasi Kota Sukabumi nandeskeun, yén gerakan literasi di satiap sakola téh kudu terus dironjatkeun jeung dimekarkeun, malar para pamilon atik mingkin resep maca jeung mingkin remen ngadongdon ka perpustakaan. Salajuna ditandeskeun, pihakna kacida ngarojongna kana program Jelita SMPN 1 Kota Sukabumi, sabab ngarupakeun program anu kacida hadean, sarta kacida positip jeung gedé pisan mangpaatna, hususna dina ngaronjatkeun jeung ngamekarkeun sakaligus ngabudayakeun literasi. Bunda Literasi Kota Sukabumi ngaharepkeun, program Jelita SMPN 1 Kota Sukabumi téh bisa ditiru ku sakola-sakola liainna di Kota Sukabumi.

Sedengkeun Kapala Dispusip Kota Sukabumi nandeskan, Pamaréntah Kota Sukabumi geus lila ngalaksanakeun program Sugema (Sukabumi Gemar Membaca) jeung Sahabat Geulis (Gerakan Literasi Sukabumi), sabage gerakan literasi di Kota Sukabumi. Lian ti éta ogé ditandeskeun, program Jelita SMPN 1 Kota Sukabumi téh, luyu jeung kadua éta program, nya éta pikeun ngajadikeun Kota Sukabumi sabagé Kota Literasi, sarta pikeun ngahasilkeun generasi panerus anu ngabogaan ajén hadé.

Saterusna Kapala SMPN 1 Kota Sukabumi, Ujang Supandi, M.Pd. ngajelaskeun, literasi di SMPN 1 Kota Sukabumi dijadikan budaya jeung kabiasaan, boh di kalangan pangatik boh di kalangan pamilon atik. Disagédéngeun ti éta ogé dijelaskeun, diluncurkeunnana program Jelita SMPN 1 Kota Sukabumi téh, ngarupakeun kasempetan jeung pang hudang sumanget pikeun para pangatik jeung pamilon atik di SMPN 1 Kota Sukabumi, dina ngaronjatkeun jeung ngamekarkeun sakaligus ngabudayakeun literasi.

Leave a Reply