SALAWASNA NGALAKSANAKEUN PANGWANGUNAN ANU NGABOGAAN BASIS SMART CITY

Reporter/Redaktur/Editor : ENDANG SUMARDI

Wali Kota Sukabumi, H. Achmad Fahmi nandeskeun, Pamaréntah Kota Sukabumi baris salawasna ngalaksanakeun pangwangunan anu ngabogaan basis smart city. Komo deui Kota Sukabumi mah geus meunang pangajén sabagé 25 kota jeung kabupatén di Indonésia nuju 100 smart city, cindekna dina taun 2017 nu geus kaliwat.

Ěta panandesan Wali Kota téh, ditepikeun basa ngaluuhan Gerakan Nuju 100 Smart City, tanggal 6 Novémber 2019, di Balé Sudirman Jakarta, dibarengan ku Kapala Diskominfo (Dines Komunikasi jeung Informatika) Kota Sukabumi, Drs. H. Gabril Majid Sukarman, M.Pd. katut réngréngnnana.

Saterusna dijelaskeun, Gerakan Nuju 100 Smart City téh ngarupakeun program Pamaréntah Républik Indonésia, anu ditaratas ku Kamentrian Komunikasi jeung Informatika. Ieu program téh meunang pangrojong sapinuhna ti Kamentrian Dalem Negri, Badan Parancanaan Pangwangunan Nasional, Kamentrian Pandayagunaan Aparatur Nagara jeung Réformasi Birokrasi, Kamentrian Pekerjaan Umum jeung Perumahan Rakyat, sarta Kantor Stap Kapersidénan.

Lian ti éta ogé dijelaskeun, sanggeus dina taun 2017 Kota Sukabumi meunang pangajén sabagé 25 kota jeung kabupatén nuju smart city, dina taun 2018 jeung 2019, program smart city di Kota Sukabumi ajénna ngarandapan undak. Lantaran ti taun 2018 nu geus kaliwat, rupa-rupa program unggulan sagemblengna geus diluyukeun jeung smart city, boh dina widang atikan jeung kaséhatan boh dina widang ékonomi jeung nu séjénna.

Leuwih jauh dijelaskeun, program smart city téh ngarupakeun kasempetan pikeun ngalaksanakeun rupa-rupa inovasi ku cara ngamangpaatkeun téknologi. Sabab smart city téh sabagé akselerator jeung alat transpormasi dina ngaronjatkeun jeung ngahangkeutkeun palayanan ka masarakat. Salajuna dijelaskeun, sakumna Kota jeung Kabupatén Nuju Smart City geus miluan bingbingan téknis jeung ngabogaan master plan atawa rancana induk, pikeun ngaronjatkeun jeung ngamekarkeun smart city di wewengkonna séwang-séwangan.

Leave a Reply