PEMKOT SUKABUMI NGALAKSANAKEUN PANANDATANGAN MOU JEUNG PERUM LKBN ANTARA

Reporter/Redaktur/Editor : ENDANG SUMARDI

Pemkot (Pemerintah Kota) Sukabumi ngalaksanakeun panandatangan MoU jeung PKS (Pajangjian Kerja Sama) Palayanan Informasi Publik jeung Perum LKBN (Perusahaan Umum Lembaga Kantor Berita Nasional) Antara, dina raraga usaha pikeun nyebarluaskeun palayanan informasi publik sacara lega ka masarakat.

Panandatangan éta MoU téh dilaksakeun ku Wakil Wali Kota Sukabumi, H. Andri S. Hamami, S.H., M.H. katut Diréksi Perum LKBN Antara, sarta panandatanganan PKS Palayanan Informasi Publik ku Kapala Diskominfo (Dines Komunikasi jeung Informatika) Kota Sukabumi anu diwakilan ku Sekertaris Diskominfo Kota Sukabumi, Kurnia Rahmandani, S,IP. katut CÉO Antara Digital Média.

Wakil Wali Kota Sukabumi ngajelaskeun kacida ngajén jeung ngabagéakeunnana ku dilaksanakeunnana éta gawé bareng téh, lantaran di tengah kawatesanan anu dipibanda ku pamaréntah daérah, LKBN Antara hadir pikeun jadi solusi jeung mitra anu hadé dina nyebarkeun informasi publik ka masarakat sacara tepat. Salajuna Wakil Wali Kota Sukabumi ngaharepkeun, ku ngaliwatan ieu gawé bareng téh bisa terus ngadorong Pemkot Sukabumi dina nyebarkeun informasi publik ka masyarakat.

Sedengkeun CÉO Antara Digital, Darmadi ngajelaskeun, sala sahiji kauntungan tina ieu gawé bareng téh, nya éta informasi ti Pamaréntah Daérah bisa asup ka Antara, jeung Antara bisa nyebarluaskeun informasi kana jaringan média informasi nu aya di Antara, boh di jero nagri boh ka luar nagri.

Lian ti éta, Antara Digital Média baris nyadiakeun Vidéotron Indoor jeung Outdoor, anu engkéna baris ditempatkeun di tempat anu geus ditangtukeun ku Pamaréntah Daérah. Saterusna dijelaskeun, informasi jeung konten anu baris ngeusi tayangan di Vidéotron téh, nya éta 40 peresén ti Antara jeung 60 peresén ti Pamaréntah Kota Sukabumi, bisa dina bentuk informasi pangwangunan, promosi wisata jeung informasi lianna, nu aya kaitannana jeung palayanan katut program Pamaréntah Daérah. (Sumber Bagian Humas jeung Protokol Setda Kota Sukabumi).

Leave a Reply