PAMARÉNTAH KOTA SUKABUMI MEUNANG PANGAJÉN PALAYANAN PANGHADÉNA TI KEMENPAN-RB

Reporter/Redaktur/Editor : ENDANG SUMARDI

Pamaréntah Kota Sukabumi meunang Pangajén Palayanan Panghadéna ti KemenPAN-RB (Kementrian Pandayagunaan Aparatur Nagara jeung Réformasi Birokrasi), pikeun palayanan publik anu dilaksanakeun ku Disdukcapil (Dines Kapadumukan jeung Panyatetan Sipil) Kota Sukabumi. Éta Pangajén téh dipasrahkeun ku MenPAN-RB, Tjahjo Kumolo, ka Wali Kota Sukabumi, H. Achmad Fahmi, dina acara pamasrahan hasil évaluasi jeung pangajén panyalagaraan palayanan publik wilayah I, di Hotél Aston Batam, Kota Batam.

Wali Kota Sukabumi nandeskeun, ku meunangna éta pangajén téh jadi pecut jeung panghudang sumanget keur Pamaréntah Kota Sukabumi, pikeun salawasna ngaronjatkeun ajén palayanan dina sagala rupa widang ka masarakat. Saterusna dijelaskeun, meunangna éta pangajén téh, lantaran Disdukcapil Kota Sukabumi salawasna usaha satékah polah ngagiatkeun program Si Jempol (Siap Jemput Bola) dina méré palayanan ka masarakat. Sabab program Si Jempol téh ngarupakeun inovasi pikeun ngadeukeutkeun jeung ngagampangkeun palayanan ka masarakat, diantarana di luar palayanan régular lima poé gawé, nya éta dina poé Saptu jeung Minggu atawa dina poé peré, di sajumlah tempat, boh di pamukiman masarakat boh di sakola sarta di pausahaan jeung pasar.

Hébatna dokumén anu dijieun dina program Si Jempol téh, dina poé éta kénéh kudu jadi, anu pamustungannana masarakat meunang palayanan anu gancang jeung gampang. Disagigireun ti éta ogé dirojong ku SDM (Sumber Daya Manusa) anu hadé, sarta sarana jeung prasarana anu nyaman jeung sistim anu kaintegrasi, luyu jeung tagline palayanan publik di Kota Sukabumi, nya éta santun jeung ngalayanan.

Salajuna Kapala Disdukcapil Kota Sukabumi, Iskandar, S.IP., M.T. ngaembohan, meunangna éta pangajén téh diantarana ku ayana program Si Jempol. Lian ti éta, ogé sinergitas katut gawé bareng jeung SKPD (Satuan Kerja Parangkat Daérah) lianna, anu ahirna bisa silih rojong jeung silih bantuan dina ngahontal indikator kinerja masing-masing SKPD.

Disagédéngeun ti éta ogé dijelaskeun, ku ngaliwatan éta upaya téh, cakupan kapamilikan dokumén kapadumukan di Kota Sukabumi ngahontal 90 peresén. Saterusna dijelaskeun, sajumlah inovasi jeung ajén palayanan ka masarakat baris terus digulirkeun jeung dironjatkeun. (Sumber Bagian Humas jeung Protokol Setda Kota Sukabumi).

Leave a Reply