AMĚRICAN RĚD CROSS, USAID, KEDUBES AS NGADONGDON PAMARĚNTAH KOTA SUKABUMI

Reporter : RIKSAN SATYAPRAWIRA

Redaktur/Editor : ENDANG SUMARDI

Palang Mérah Amérika Serikat atawa Américan Réd Cross, USAID, Kedubes AS (Kedutaan Besar Amérika Serikat) dibarengan ku PMI (Palang Mérah Indonésia) Puseur jeung Kota Sukabumi, ngadongdon Pamaréntah Kota Sukabumi ngalaksanakeun pasamoan jeung gunem catur ngeunaan pananggulangan bencana di Kota Sukabumi, cindekna tanggal 12 November 2019.

Anapon kadatangan éta rombongan téh, dibagéakeun sakaligus ditarima sacara resmi ku Sekertaris Daérah Kota Sukabumi, Drs. H. Dida Sembada, M.M., di Rohangan Utama Balé Kota Sukabumi.

Dina kasempetan éta, Sekertaris Daérah Kota Sukabumi ngajelaskeun ngeunaan program pananggulangan bencana di Kota Sukabumi anu geus diterapkeun, saperti Kalurahan Tangguh Bencana. Lian ti éta, ogé ngeunaan kawaspadaan bencana salawasna ditepikeun ka masarakat, ngalibetkeun para Ketua RW.

Saréngséna pasamoan,  diteruskeun ngadongdon sababaraha tempat, diantarana ka Diskominfo (Dines Komunikasi jeung Informatika) Kota Sukabumi. Dina éta dongdonan téh, Sekertaris Diskominfo Kota Sukabumi, Kurnia Rahmandani, S.IP., M.AP., diantarana ngajelaskeun ngeunaan aplikasi android Super (Sukabumi Participatory Résponder), anu geus dilengkepan Tombol Panik atawa Panic Button, pikeun kagawatdaruratan.

Salajuna dijelaskeun ngeunaan frékuénsi radio kabencanaan, prosedur pananganan bencana, sarta peran Diskominfo dina pananggulangan bencana. Dongdonan éta rombongan téh diteruskeun ka LPPL (Lembaga Panyiaran Publik Lokal) Radio Swara Perintis Kota Sukabumi, pikeun meunang warta ngeunaan peran radio dina pananggulangan bencana.

Dongdonan Américan Réd Cross, USAID, Kedubes AS ka Kota Sukabumi téh aya tumalina jeung dijadikeunnana PMI Kota Sukabumi sabagé sala sahiji tina 2 daérah di Indonésia anu dijadikeun proyék pacontohan gawé bareng PMI Puseur jeung Américan Réd Cross, dina pananggulangan bencana. Ěta proyék pacontohan téh, danget ieu dipuseurkeun di Kacamatan Baros.

Leave a Reply