PARA WRĚDATAMA SANGKAN TETEP NGAROJONG PANGWANGUNAN DINA SAGALA WIDANG

Reporter/Redaktur/Editor : ENDANG SUMARDI

Wakil Wali Kota Sukabumi, H. Andri S. Hamami, S.H., M.H., ngaharepkeun ka para wrédatama atawa pangsiunan PNS, sangkan tetep ngarojong pangwangunan dina sagala widang. Harepan éta téh ditepikeun basa ngaluuhan acara Pangéling-ngéling Tepung Taun Ka 57 PWRI (Pasatuan Wrédatama Républik Indonésia) Taun 2019 Tingkat Provinsi Jawa Barat, di Gedong Saté Bandung, 13 Novémber 2019.

Salajuna dijelaskeun, éta harepan téh sajalan jeung Téma Pangéling-ngéling Tepung Taun Ka 57 PWRI Taun 2019, nya éta Siap Ngarojong Pangwangunan Padésaan pikeun Indonésia Ngahiji jeung Sajahtra. Dina kasempetan éta hadir Wali Kota Sukabumi Pariodeu Taun 1988-1993, H. Zaénudin Mulaébary, S.H., katut Wali Kota Sukabumi Pariodeu Taun 1998-2003, Dra. Hj. Molly Mulyahayati Djubaédi, M.Sc.

Lian ti éta ogé dijelaskeun, para Pangsiunan PNS di Kota Sukabumi anu ngagabung ka PWRI, salawasna ngabantu pangwangunan dina sagala widang. Sabab para Pangsiunan PNS di Kota Sukabumi mibanda poténsi anu kacida réana, lantaran ngawengku ti rupa-rupa profési.

Salajuna dijelaskeun, luyu jeung Program Unggulan Ka 7 Jawa Barat nya éta Gerakan Ngawangun Désa dina raraga ngalaksanakeun Visi Jawa Barat nya éta Ngawujudna Jawa Barat Juara Lahir Batin ngaliwatan inovasi jeung koloborasi. Ku sabab kitu Wakil Wali Kota Sukabumi miharep, sangkan para Anggota PWRI di Kota Sukabumi bisa tetep aktif nyumbangkeun kontribusi, boh mangrupa pamikiran, kamandang jeung saran boh kagiatan nyata lianna, dina raraga ngawujudkeun Visi Wali Kota katut Wakil Wali Kota Sukabumi, nya éta Ngawujudna Kota Sukabumi anu Renyah (Réligius, Nyaman jeung Sajahtra), sarta Visi Jawa Barat nya éta Ngawujudna Jawa Barat Juara Lahir Batin. (Sumber Bagian Humas jeung Protokol Setda Kota Sukabumi).

Leave a Reply