KOTA SUKABUMI JUARA KAHIJI PASANGGIRI TEMBANG KENANGAN TINGKAT JAWA BARAT

Reporter/Redaktur/Editor : ENDANG SUMARDI

Kota Sukabumi hasil nyangking gelar juara kahiji Pasanggiri Tembang Kenangan Tingkat Provinsi Jawa Barat, dina raraga Miéling Tepung Taun Ka 54  Poé Aksara Internasional  Taun 2019 Tingkat Jawa Barat, di Alun-Alun Kabupatén Garut, anu ngangkat téma Ngamekarkeun Literasi Kaparigelan anu Ngabogaan Budaya.

Wakil Wali Kota Sukabumi, H. Andri S. Hamami, S.H., M.H., ngucapkeun rasa syukur, yén dina runtuyan acara Pangéling-ngéling Ka 54 Poé Aksara Internasional  Taun 2019 Tingkat Jawa Barat, Kota Sukabumi hasil nyangking gelar juara kahiji Pasanggiri Tembang Kenangan. Sabab bisa jadi kareueus sakumna pihak, sarta bisa nyambuangkeun wawangi ngaran Kota Sukabumi.

Salian ti éta, Wakil Wali Kota Sukabumi kacida ngajénna ku dilaksanakeunnana ieu Pangéling-ngéling Poé Aksara teh, lantaran dieusi ku rupa-rupa pasanggiri kasenian jeung kabudayaan, kaasup seminar jeung lokakarya, sarta paméran produk unggulan daérah, paméran atikan jeung kabudayaan, anu diiluan ku 27 kota jeung kabupatén sa Jawa Barat.

Salajuna dijelaskeun, Pangéling-ngéling Poé Aksara Internasional anu dilaksanakeun sacara rutin satiap taun téh, pikeun ngingetan ka masarakat internasional, kana pentingna melék aksara pikeun pasaurangan, komunitas jeung masarakat. Disagigireun ti éta ogé ngarupakeun program atikan kaaksaraan, dina ngamangpaatkeun rupa-rupa kasempetan tina kaanékaragaman aksara, bahasa jeung budaya,

Lian ti éta ogé dijelaskeun, éta kagiatan téh bisa ngadorong pamaréntah pikeun salawasna usaha ngaréngsékeun masalah buta aksara jeung ngamekarkeun literasi, sakaligus pikeun ngalaksanakeun sosialisasi atawa ngawanohkeun rupa-rupa jenis kasenian jeung kabudayaan ti masing-masing kota jeung kabupatén sa Jawa Barat, sakaligus méré atikan ka masarakat hususna ka para palajar. (Sumber Bagian Humas jeung Protokol Setda Kota Sukabumi).

Leave a Reply