KOTA SUKABUMI KIWARI NGABOGAAN BEUS WISATA ANU DINGARANAN AJAK KAMI

Reporter/Redaktur/Editor : ENDANG SUMARDI

Kota Sukabumi kiwari ngabogaan Beus Wisata anu dingaranan Ajak Kami (Ayo Jalan-Jalan Ka Kota Sukabumi). Ěta beus téh paméré ti Pamaréntah Provinsi Jawa Barat, anu dipasrahkeun langsung ku Gubernur Jawa Barat, Ridwan Kamil, ka Wali Kota Sukabumi, H. Achmad Fahmi, sawatara waktu ka tukang, di Gedong Saté Bandung.

Wali Kota Sukabumi basa nyobaan naék éta beus nguriling Kota Sukabumi, cindekna dina poé Salasa isuk, 19 Novémber 2019 ngajelaskeun, Beus Wisata di jero Kota Sukabumi téh, dikalola ku Organda (Organisasi Angkutan Darat) Kota Sukabumi, luyu jeung amanat Gubernur Jawa Barat.

Anapon ngeunaan ruteu jeung harga karcis éta beus téh, baris diatur dina Perwal (Peraruran Wali Kota) Sukabumi, sanggeus dilaksanakeun komunikasi leuwih laju jeung sakumna pihak nu aya kaitannana, kaasup keur acara husus dina raraga ngawanohkeun tempat wisata sajarah anu dipibanda Kota Sukabumi.

Saterusna dijelaskeun, pangalolaan ieu beus téh dilaksanakeun sacara profésional, pikeun ngawanohkeun Kota Sukabumi ka wisatawan. Maksud jeung tujuannana, supaya Kota Sukabumi bisa leuwih dipikawanoh, sarta réa wisatawan nu datang ka Kota Sukabumi, boh ti jero boh ti luar nageri. Lian ti éta ogé dijelaskeun, ieu beus téh ngarupakeun sala sahiji inovasi nyiptakeun rasa aman jeung nyaman, sarta genah jeung senang pikeun para panumpangna.

Basa dikolongan ngeunaan pangoprasian atawa panggunaan ieu beus pikeun umum, sakumaha anu dijelaskeun ku Wali Kota Sukabumi, nurutkeun rarancangna baris dilaunching dina bulan Désémber 2019 nu bakal datang, satutas Perwal ngeunaan ruteu jeung harga karcis ieu beus diterbitkeun jeung ditetepkeun.

Leave a Reply