PARA PANGUSAHA PANGAYAAN BARANG JEUNG JASA SANGKAN ILUBIUNG NGAWANGUN KOTA SUKABUMI

Reporter/Redaktur/Editor : ENDANG SUMARDI

Wali Kota Sukabumi, H. Achmad Fahmi ngaharepkeun, para Pangusaha Pangayaan Barang jeung Jasa sangkan ilubiung ngawangun Kota Sukabumi, diantarana ku cara nguntun gawé bareng jeung sabilulungan sarta silih rojong jeung Pamaréntah Kota Sukabumi, hususna dina usaha ngawujudkeun Kota Sukabumi anu Renyah (Réligieus, Nyaman jeung Sajahtra).

Ěta harepan téh ditepikeun dina Seminar jeung Diskusi Paraturan Persidén Nomer 16 Taun 2018 ngeunaan Pangayaan Barang jeung Jasa Pamaréntah, sawatara poé ka tukang, di Hotél Balcony Kota Sukabumi, anu dilaksanakeun ku FKPPBJ (Forum Komunikasi Pangusaha Pangayaan Barang jeung Jasa) Kota Sukabumi, sakaligus ngistrénan pangurus FKPPBJ Kota Sukabumi. Anapon nu hadir dina kasempetan éta, Ketua DPRD Kota Sukabumi, H. Kamal Suhérman, S.H., para Kapala OPD (Organisasi Parangkat Daérah) jeung instansi nu aya tumalina, sarta para tamu ondangan lianna.

Salian ti éta, Wali Kota Sukabumi ogé nepikeun amanat Persidén RI, Jokowi, basa Rakornas (Rapat Kordinasi Nasional) Indonésia Maju Pamaréntah Puseur jeung Forkopimda (Forum Komunikasi Pimpinan Daérah) sawatara waktu ka tukang, yén Kapala Daérah boh kota boh kabupatén jeung provinsi katut Forkopimda, kudu ngahangkeutkeun pangwangunan di wewengkonna masing-masing.

Salajuna dijelaskeun, dina ngahangkeutkeun pangwangunan téh aya 3 konci utama anu kudu salawasna dipahatikeun jeung dilaksanakeun ku pamaréntah kota jeung kabupatén sarta provinsi, sala sahijina nya éta ngahangkeutkeun pangwangunan infrastruktur. Lantaran dumasar kana hasil kajian, éta pangwangunan téh bisa ngadongkrak angka kaséhatan, atikan jeung kasajahtraan. Disagigireun ti éta ogé dijelaskeun, dina ngahangkeutkeun pangwangunan infrastruktur téh teu bisa dilaksanakeun ku pamaréntah wungkul, tapi dibutuhkeun gawé bareng jeung sabilulungan anu hadé, ku cara nerapkeun konsép péntahelik ABCGM, nya éta Akademisi, Bisnis, Communitas, Goverment jeung Média.

Saterusna Wali Kota Sukabumi ngaharepkeun, ayana FKPPBJ Kota Sukabumi téh bisa ngahijikeun para Pangusaha Pangayaan Barang jeung Jasa di Kota Sukabumi. Ěta hal téh luyu jeung lambang FKPPBJ, nya éta ngabogaan harti babarengan jeung sabilulungan.

Nyigeung ngeunaan Paraturan Persidén Nomer 16 Taun 2018 ngeunaan Pangayaan Barang jeung Jasa Pamaréntah, numutkeun Wali Kota Sukabumi sumangetna bisa ngadorong kana paningkatan kompeténsi, boh pikeun Pamaréntah boh pikeun Pangusaha, kaasup pikeun Pangusaha Pangayaan Barang jeung Jasa. Anapon ngeunaan targét Pangayaan Barang jeung Jasa di Kota Sukabumi, bisa leuwih hadé jeung profésional deui, sarta baris mahatikeun Pangusaha Lokal.

Leave a Reply