KOTA SUKABUMI KAPILIH JADI PANYALAGARA FĚSTIVAL SKJ JADUL

Reporter/Redaktur/Editor : ENDANG SUMARDI

Kota Sukabumi kapilih sabagé sala sahiji tina 34 daérah di Indonésia, jadi panyalagara Féstival SKJ (Senam Kasegeran Jasmani) Jadul. Ěta féstival anu dirojong ku Kemenpora (Kementrian Pamuda jeung Olahraga), Disporapar (Dines Kapamudaan, Olahraga jeung Pariwisata), sarta ASIAFI (Asosiasi Senam, Instruktur Aérobic jeung Fitnes Indonésia) téh, dibuka sacara resmi ku Wali Kota Sukabumi, H. Achmad Fahmi, anyar-anyar ieu, di Lapangan Merdéka Kota Sukabumi.

Hadir dina kasempetan éta, pajabat ti Kemenpora, Sri Maryati, Dandim 0607 Kota Sukabumi, Létkol Inf. Danang Prasetyo Wibowo, para Kapala OPD (Organisasi Parangkat Daérah) jeung instansi nu aya tumalina, Ketua FORMI (Federasi Olahraga Rékréasi Masarakat Indonésia) Kota Sukabumi, Indra Wiguna, sarta para tamu ondangan lianna.

Dina biantarana Wali Kota Sukabumi ngajelaskeun, Féstival SKJ ieu téh ngarupakan spesial pikeun Kota Sukabumi, lantaran ngan ukur aya 2 kota di Jawa Barat anu ngalaksanakeun ieu festival, nya éta Kota Sukabumi jeung Kota Bogor, tina 34 daérah sa Indonésia. Saterusna dijelaskeun, Kemenpora milih Kota Sukabumi jadi panyalagara ieu féstival téh, lantaran masarakat Kota Sukabumi dina ngalaksanakeun olah raga jeung sumanget dina ngaronjatkeun darajat kaséhatan ngaliwatan olah raga kacida luhurna. Lian ti éta ogé dijelaskeun, ngaliwatan olah raga bisa ngaronjatkeun angka harepan hirup sarta ngaronjatkeun ajén jeung darajat kaséhatan masarakat.

Sedengkeun Ketua FORMI Kota Sukabumi, Indra Wiguna ngajelaskeun, maksud jeung tujuan dilaksanakeunnana ieu féstival téh, diantarana pikeun ngawangun budaya olah raga di masatakat, sarta pikeun ngaronjatkeun darajat kaséhatan masarakat. Salian ti éta ogé pikeun ngarojong jeung ngadorong program Pamaréntah Kota Sukabumi, hususna dina ngaronjatkeun indéks pangwangunan olah raga. Anapon anu miluan kana ieu féstival téh sagemblengna aya 1.200 urang, anu ngawengku ti palajar SD, SMP jeung SMA, sarta masarakat umum.

Leave a Reply