KAPALA SAKOLA SWASTA JEUNG NEGRI WAJIB MIBANDA NUKS

Reporter/Redaktur/Editor : ENDANG SUMARDI

Wali Kota Sukabumi, H. Achmad Fahmi nandeskeun, saméméhna Kapala Sakola Swasta ditetepkeun ngaliwatan Hak Prérogatif Yayasan. Ngan ku ayana aturan atawa régulasi anyar, Kapala Sakola Swasta jeung Negri wajib mibanda NUKS (Nomer Unik Kapala Sakola), sarta saupama teu mibanda teu bisa.

Sedengkeun maksud jeung tujuan diterapkeunnana éta aturan atawa kawijakan téh, supaya para Kapala Sakola Swasta jeung Negri mibanda standar kompeténsi atawa kamampuhan anu sarua hususna dina ngolah sakola anu dipingpinna, sarta standar anu sarua nya éta ngabogaan basis inovasi. Sabab ku éta hal téh, ajén atikan di sakola swasta jeung negri bisa leuwih hadé ti waktu ka waktu.

Panandesan Wali Kota Sukabumi éta téh, ditepikeun basa ngaluuhan sosialisasi Permendikbud (Peraturan Mentri Pendidikan jeung Kabudayaan) RI Nomer 6 Taun 2018 ngeunaan Panugasan Guru sabagé Kapala Sekola, di Hotél Balcony Kota Sukabumi, anyar-anyar ieu.

Sosialisasi anu dilaksanakeun ku Dines Pendidikan jeung Kabudayaan Kota Sukabumi téh, sabagé sala sahiji bagian inovasi atikan, ngaliwatan panugasan guru sabagé kapala sakola di yayasan atawa sakola swasta.

Lian ti éta, Wali Kota Sukabumi ogé nepikeun amanat Persidén RI, Jokowi, dina Rakornas (Rapat Kordinasi Nasional) Indonésia Maju Pamaréntah Puseur jeung Forkopimda (Forum Komunikasi Pimpinan Daérah), nya éta satiap daérah di Indonésia kudu ngahangkeutkeun pangwangunan kaasup inovasi atikan. Anapon sala sahiji bentuk inovasi atikan, nya éta sosialisasi pikeun para pangalola yayasan atawa sakola swasta, hususna dina netepkeun kapala sakola.

Leave a Reply