PAMARĚNTAH KOTA SUKABUMI SALAWASNA USAHA NGURANGAN KAWASAN KUMUH

Reporter/Redaktur/Editor : ENDANG SUMARDI

Pamaréntah Kota Sukabumi salawasna usaha ngurangan kawasan kumuh. Sala sahijina ngaliwatan Program Cipélang Hérang, nya éta cai anu ngocor di Wahangan Cipélang diharepkeun bersih jeung ditata sacara hadé, anu pamustungannana caina ngagenclang hérang, alamna héjo ngémploh jeung matak betah ditempatannana.

Ěta hal téh ditepikeun ku Wali Kota Sukabumi, H. Achmad Fahmi, basa ngabagéakeun sakaligus narima sacara resmi rombongan Kunker (Kunjungan Kerja) Kamentrian PUPR (Pekerjaan Umum jeung Perumahan Rahayat), anyar-anyar ieu, di Rohangan Utama Balé Kota Sukabumi. Anapon nu jadi sala sahiji bahasan dina éta kunker téh, nya éta program Kotaku (Kota Tanpa Kumuh), anu digulirkeun ku Kamentrian PUPR di Kota Sukabumi.

Hadir dina kasempetan éta, Sekertaris Daérah Kota Sukabumi, Drs. H. Dida Sembada, M.M., Kasubdit Kawasan Pamukiman Wilayah II Diréktorat Pangembangan Kawasan Pamukiman Ditjén (Diréktorat Jéndral) Cipta Karya Kamentrian PUPR, Soélistianing Kusumawati, katut para Kapala OPD (Organisasi Parangkat Daérah) jeung instansi nu aya tumalina.

Saterusna dijelaskeun, saupama Program Cipélang Hérang téh bisa diwujudkeun sacara hadé, bisa jadi tempat wisata sarta bisa ngabogaan pangaruh kana ngaronjatna paékonomian jeung kasajahtraan masarakat. Salian ti éta, darajat kaséhatan masarakat ogé baris ngaronjat. Disagigireun ti éta ogé dijelaskeun, kawasan kumuh di Kota Sukabumi dina saban taunna terus ngurangan, nya éta tina asalna dina taun 2015 ngahontal 139 héktar, dina danget ieu ngan ukur tinggal 32 héktar deui.

Leave a Reply