PAMARÉNTAH KOTA SUKABUMI MEUNANG DEUI LAYANG PANGAJÉN JDIH PANGHADÉNA

Reporter/Redaktur/Editor : ENDANG SUMARDI

Pamaréntah Kota Sukabumi ngaliwatan Bagian Hukum Setda Kota Sukabumi, meunang deui layang pangajén JDIH (Jaringan Dokuméntasi jeung Informasi Hukum) Panghadéna Ka 1 Tingkat Provinsi Jawa Barat Taun 2019. Sedengkeun Panghadéna Ka 2 dicangking ku Kabupatén Bandung, jeung Panghadéna Ka 3 ku Kabupatén Garut.

Ěta layang pangajén téh dipasrahkeun langsung ku Mentri Hukum jeung Hak Asasi Manusa, Yasonna Laoly katut Wakil Gubernur Jawa Barat, H. Uu Ruzhanul Ulum, ka Wakil Wali Kota Sukabumi, H. Andri S. Hamami, S.H., M.H., dina acara Ngaresmikeun Désa jeung Kalurahan Sadar Hukum katut JDIH Award Pamaréntah Provinsi Jawa Barat Taun 2019, di Gedong Saté Provinsi Jawa Barat, tanggal 4 Désémber 2019.

Dina éta kasempetan, Mentri Hukum jeung Hak Asasi Manusa nepikeun pangajén ka pamaréntah daérah anu salawasna usaha satékah polah ngalaksanakeun pangalolaan sarta paningkatan jeung ngamekarkeun JDIH. Sabab ku éta hal téh, béwara ngeunaan hukum bisa ditepikeun ka masarakat sacara gancang jeung gampang, sarta bisa ngaronjatkeun kasadaran hukum masarakat.

Sedengkeun Wakil Wali Kota Sukabumi ngucapkeun rasa sukur, yén Pamaréntah Kota Sukabumi meunang deui layang pangajén JDIH Panghadéna Ka 1 Tingkat Provinsi Jawa Barat Taun 2019. Lantaran dina taun 2018 nu geus kaliwat, meunang layang pangajén anu sarua, nya éta Panghadéna Ka 1 Tingkat Provinsi Jawa Barat.

Salajuna ngajelaskeun, JDIH téh ngarupakeun sala sahiji bentuk palayanan pamaréntah daérah ka masarakat. Ku éta hal téh, masarakat nu ngabutuhkeun rupa-rupa dokuméntasi jeung informasi nu aya kaitannana jeung produk hukum, bisa gancang jeung gampang ngaliwatan JDIH. Sabab dina JDIH téh dipidangkeun rupa-rupa dokuméntasi jeung informasi nu aya tumalina jeung rupa-rupa produk hukum ti taun ka taun.

Leuwih jauh ngajelaskeun, pikeun masarakat nu ngabutuhkeun rupa-rupa dokuméntasi jeung informasi nu aya kaitannana jeung produk hukum, bisa datang langsung ka Bagian Hukum Setda Kota Sukabumi, atawa ku cara ngunduh aplikasi JDIH Pamaréntah Kota Sukabumi, dina Playstoré Smart Phoné-na masing-masing. (Sumber Bagian Humas jeung Protokol Setda Kota Sukabumi).

Leave a Reply