WALI KOTA SUKABUMI MEUNANG LAYANG PANGAJÉN SABAGÉ WALI KOTA ĚNTREPRENEUR AWARD 2019

Reporter/Redaktur/Editor : ENDANG SUMARDI

Wali Kota Sukabumi, H. Achmad Fahmi, meunang layang pangajén sabagé Wali Kota Ěntrepreneur Award 2019, kategori kaséhatan jeung padagangan, anu dipasrahkeun ku Staf Ahli Mentri Dalem Negri Widang Pamaréntahan, Suhajar Diantoro katut Founder and Chairman MarkPlus, Inc., Hérmawan Kertajaya, dina acara Régional Léader Ěntrepreneur Award 2019, di Ballroom 1C, Ritz Carlton Pacific Place, Komplék SCBD Jakarta, tanggal 4 Désémber 2019, anu dicalagarakeun ku MarkPlus,Inc. Sedengkeun pangajénannana dilaksanakeun ku Philip Kotler Cénter for ASĚAN Marketing, sarta ngacu kana pangajénan kinerja anu dilaksanakeun ku Kamentrian Dalem Negri.

Ěta layang pangajén téh dipasrahkeun ka para Kapala Daérah, nya éta Bupati, Wali Kota katut Gubernur, anu dirojong ku APKASI (Asosiasi Pemerintah Kabupatén Seluruh Indonésia), APEKSI (Asosiasi Pemerintah Kota Seluruh Indonésia), sarta APPSI (Asosiasi Pemerintah Provinsi Seluruh Indonésia).

Dina kasempetan éta, Founder and Chairman MarkPlus, Inc., Hérmawan Kertajaya ngajelaskeun, ieu layang pangajén téh dipasrahkan ka para Kapala Daérah, anu salawasna usaha satékah polah ngamajukeun daérahna ngaliwatan 3 karakter, nya éta inovasi, kréativitas jeung éntrepreneurship. Saterusna ngajelaskeun, panetepan éta para kapala daérah téh, dicalagarakeun satutas dilaksanakeun pangajénan anu panjang, sarta ngaliwatan audiénsi langsung jeung Dirjén Otda (Diréktur Jéndral Otonomi Daérah) katut klarifikasi jeung Tim Ditjén (Diréktorat Jéndral) Otda.

Sedengkeun Wali Kota Sukabumi, H. Achmad Fahmi, ngucapkeun rasa sukur ku meunangna éta layang pangajén téh, sarta baris jadi pecut jeung panghudang sumanget pikeun terus ngawangun Kota Sukabumi ka nu leuwih hadé deui dina sagala widang, gawé bareng jeung sakumna pihak. Salajuna ngajelaskeun, ieu layang pangajén téh ngarupakeun hasil gawé rancagé babarengan sakumna pihak, dina ngawangun Kota Sukabumi hususna dina widang kaséhatan jeung padagangan.

Anapon pangwangunan jeung palayanan dina widang kaséhatan, Pamaréntah Kota Sukabumi ngagulirkeun program Homé Caré, Ambulans SIGAP (Siap Ihlas Sagancangna Antar Jemput Pasén) 24 jam, Rumah Singgah di Bandung, jeung Puskesmas Klinik Soré anu muka nepi ka peuting.

Saterusna dina widang padagangan, Pamaréntah Kota Sukabumi ngagulirkeun program Sukabumi Kécé (Kalurahan Ěntrepreneurship Cénter), pikeun ngadorong lahirna para wirausaha anyar. Disagédéngeun ti éta ogé ngajelaskeun, Pamaréntah Kota Sukabumi katut sakumna instansi nu aya kaitannana, baris terus nyiptakeun jeung ngalaksanakeun inovasi dina méré jeung ngaronjatkeun palayanan anu sahadé-hadéna ka masarakat. (Sumber Bagian Humas jeung Protokol Setda Kota Sukabumi).

Leave a Reply