WAKIL WALI KOTA SUKABUMI NGALUUHAN RAKORNAS TPAKD

Reporter/Redaktur/Editor : ENDANG SUMARDI

Wakil Wali Kota Sukabumi, H. Andri S. Hamami, S.H., M.H., ngaluuhan Rakornas (Rapat Kordinasi Nasional) TPAKD (Tim Percepatan Aksés Keuangan Daérah) jeung Silaturahmi Nasional Bank Wakaf Mikro, di Jakarta, tanggal 10 Désémber 2019. Rakornas jeung silaturahmi éta téh, dibuka sacara resmi ku Persidén, Joko Widodo. Anapon maksud jeung tujuan dilaksanakeunnana Rakornas jeung silaturahmi éta téh, pikeun ngadorong panghangkeutan aksés kauangan masarakat, boh pikeun aksés nabung bon pikeun kiridit dina ngaronjakeun kasajahtraan.

Dina biantarana, Persidén ngadorong sangkan barudak ti SD jeung SMP nepi ka SMA jeung SMK, diatik nabung jeung bisa ngaaksés ka bank. Sedengkeun pikeun urusan kiridit, numutkeun Persidén geus aya program Bank Wakaf Mikro, sarta dina danget ieu geus aya di 55 pondok pasantrén jeung baris terus ditambah.

Sedengkeun Wakil Wali Kota Sukabumi, H. Andri S. Hamami, S.H., M.H. ngajelaskeun, Pamaréntah Kota Sukabumi siap ngarojong program jeung kawijakan pamaréntah puseur, dina panghangkeutan aksés kauangan masarakat. Diantarana ku ngadorong panyaluran kiridit keur séktor informal ngaliwatan Bank Wakaf Mikro, pikeun ngadongkrak usaha mikro masarakat.

Salajuna ngajelaskeun, pangwaragadan keur usaha mikro téh pikeun ngaronjatkeun kasajahtraan masarakat, sarta henteu ngan saukur dirojong ku pamaréntah daérah hungkul, tapi ogé ku bank wakaf mikro. Salian ti éta ogé dijelaskeun, mingkin gancang aksés kauangan di daérah, baris mingkin gancang ogé kasajahtraan masarakat, sarta bisa nyingkahan réntenir jeung bisa ngadorong kana paningkatan KUR (Kiridit Usaha Rahayat).

Wakil Wali Kota Sukabumi ngaharepkeun, sajumlah éta kasempetan téh supaya dimangpaatkeun ku masarakat sahadé-hadéna. Komo deui di Kota Sukabumi mah aya program kiridit Anyelir, nya éta Anti Nginjeum ka Réntenir. (Sumber Bagian Humas jeung Protokol Setda Kota Sukabumi).

Leave a Reply