KOTA SUKABUMI MEUNANG LAYANG PANGAJÉN KOTA PADULI HAM TAUN 2018

Reporter/Redaktur/Editor : ENDANG SUMARDI

Kota Sukabumi meunang Layang Pangajén Kota Paduli HAM (Hak Asasi Manusa) Taun 2018. Ěta Layang Pangajén téh dipasrahkeun ku Dirjén (Diréktur Jéndral) HAM Kemenkum (Kementrian Hukum) jeung HAM, Mualimin Abdi, ka Wali Kota Sukabumi, H. Achmad Fahmi, dina acara Pangéling-ngéling Poé HAM Ka 71 sa Dunya Taun 2019, anu dipuseurkeun di Gedong Merdéka, Jalan Asia Afrika Kota Bandung, tanggal 10 Désémber 2019. Salian ti Layang Pangajén Kritéria Kabupatén jeung Kota Paduli HAM, ogé dipasrahkeun Sértifikat Pangajénan HAM ka Kabupatén jeung Kota sa Indonésia.

Dina kasempetan éta hadir Mentri Kordinator Widang Pulitik, Hukum jeung HAM, Mahfud M.D., Mentri Hukum jeung HAM, Yasonna Laoly, Gubernur Jawa Barat, Ridwan Kamil, unsur Forkopimda (Forum Komunikasi Pimpinan Daérah) Provinsi Jawa Barat, para Kapala OPD (Organisasi Parangkat Daérah), katut para tamu ondangan lianna.

Wali Kota Sukabumi, H. Achmad Fahmi, ngarasa reueus jeung muji sukur ku meunangna éta layang pangajén téh, lantaran bisa jadi panghudang sumanget keur Pamaréntah Kota Sukabumi, pikeun salawasna mahatikeun HAM. Saterusna ngajelaskeun, Poé HAM anu dipiéling dina satiap tanggal 10 Désémber téh, nya éta pikeun ngadorong kamajuan jeung kacumponannana HAM.

Lian ti éta ogé ngajelaskeun, data Kemenkum jeung HAM nyebutkeun, sajumlah 425 kabupatén jeung kota tina jumlah sagemblengna 514 kabupatén jeung kota sa Indonésia, geus ilubiung jeung nepikeun data ngeunaan hasil usaha dina nyumponan HAM. Tina éta jumlah téh, sajumlah 272 kabupatén jeung kota nyumponan kategori Paduli HAM kaasup Kota Sukabumi, sarta sajumlah 96 kabupatén jeung kota dikategorikeun Cukup Paduli HAM.

Disagédéngeun ti éta Wali Kota Sukabumi ogé ngajelaskeun, luyu jeung téma Poé HAM Ka 71 sa Dunya Taun 2019, nya éta Palayanan Publik anu Adil, Pamaréntah Kota Sukabumi baris salawasna usaha nyumponan hak dasar pikeun masarakat dina sagala widang, kaasup HAM. (Sumber Bagian Humas jeung Protokol Setda Kota Sukabumi).

Leave a Reply