MASARAKAT KACAMATAN LEMBURSITU BARIS NGABOGAAN WANGUNAN PUSKESMAS ANYAR

Reporter : RIKSAN SATYAPRAWIRA

Redaktur/Editor : ENDANG SUMARDI

Masarakat Kacamatan Lembursitu Kota Sukabumi, dina taun 2020 baris ngabogaan wangunan Puskesmas anyar. Ěta Fasilitas Kaséhatan Tingkat Pertama téh, dina danget ieu keur diwangun dina lahan ampir 2.000 méter pasagi, cindekna di Jalan Loa Copong Kalurahan Lembursitu, Kacamatan Lembursitu, Kota Sukabumi.

Anapon sumber waragad pangwangunan éta Puskesmas téh, nya éta salian tina DAK (Dana Alokasi Khusus), ogé ngamangpaatkeun DBHCHT (Dana Bagi Hasil Cuké Hasil Tembakow), anu dikokolakeun ku Dines Kaséhatan Kota Sukabumi.

Sedengkeun pamangpaatan DBHCHT anu dikokolakeun ku Dines Kaséhatan Kota Sukabumi dina taun anggaran 2019, salian ti ngawangun Puskesmas Lembursitu, ogé digunakeun mayar Prémi Iuran BPJS pikeun 42.000 leuwih masarakat anu teu mampuh.

Pamayaran Prémi Iuran BPJS téh luyu jeung paraturan, anu ngawajibkeun Pamarntah Daérah nanggung 60 peresén waragad pamilon PBI (Panarima Bantuan Iuran), jeung sésana 40 peresén ditanggung ku Pamaréntah Provinsi.

Salajuna pamangpaatan DBHCHT téh, dilaksanakeun luyu jeung Paraturan Mentri Kauangan Nomer 222/PMK.07/2017, yén séktor kaséhatan meunang hancengan pang badagna dina pamangpaatan DBHCHT, nya éta saeutikna 50 peresén pikeun widang kaséhatan anu ngarojong kana program JKN (Jaminan Kaséhatan Nasional).

Pangrojong DHCHT kana program JKN téh diarahkeun kana sisi supply side, nya éta pikeun ngaronjatkeun ajén-inajén fasilitas kaséhatan tingkat pertama di daérah, sabagé unit palayanan kaséhatan pang hareupna dina program JKN.

Leave a Reply