MASALAH OMONGAN KAIJID JEUNG BERITA HOAKS JADI PAHATIAN PAMARÉNTAH KOTA SUKABUMI

Reporter/Redaktur/Editor : ENDANG SUMARDI

Sekertaris Daérah Kota Sukabumi, Drs. H. Dida Sembada, M.M. nandeskeun, masalah omongan kaijid jeung berita hoaks anu danget ieu sering muncul di Médsos (Média Sosial), jadi pahatian Pamaréntah Kota Sukabumi, sarta panyebarannana kudu diteken jeung diungkulan.

Ěta panandesan téh ditepikeun basa muka Panyuluhan Hukum Tingkat Kota Sukabumi, sawatara poé ka tukang, anu diiluan ku ASN (Aparatur Sipil Nagara) jeung Mahasiswa, sarta ngangkat téma Panyegahan Omongan Kaijid jeung Panyebaran Hoaks.

Panyuluhan Hukum anu dilaksanakeun ku Bagian Hukum Setda Kota Sukabumi téh, dihadiran ku Asistén Pamaréntahan Setda Kota Sukabumi, Drs. H. Andri Setiawan, M.M., sarta ngahadirkeun sajumlah nara sumber, diantarana ti Pangadilan Negri Sukabumi.

Salajuna ngajelaskeun, ieu panyuluhan hukum téh kacida positipna di tengah kamekaran téknologi informasi danget ieu, sala sahijina médsos. Salian ti éta ogé kacida luyuna jeung pasualan kakiwarian, utamana dina upaya panyegahan omongan kaijid jeung berita hoaks. Disagigireun ti éta ogé djelaskeun, danget ieu kacida héséna ngabédakeun, mana berita anu bener jeung mana anu asup kana kritéria omongan kaijid jeung berita hoaks.

Ku sabab kitu, Sekertaris Daérah Kota Sukabumi ngaharepkeun, ku dilaksanakeunnana ieu panyuluhan hukum téh, para ASN jeung Mahasiswa bisa paham kana konsékuénsi hukum, sarta bisa nyingkahan jeung teu nyebarkeun omongan kaijid jeung berita hoaks.

Sedengkeun nara sumber ti Pangadilan Negri Sukabumi, Dian Fhébrian ngajelaskeun, masalah omongan kaijid jeung berita hoaks diatur dina sajumlah katangtuan, utamana dina KUHP (Kitab Undang-undang Hukum Pidana) jeung Undang-Undang ngeunaan ITE (Informasi jeung Transaksi Ěléktronik).

Leave a Reply