DPU-PRP-KPP KOTA SUKABUMI MASRAHKEUN PROGRAM BSPS JEUNG RUTILAHU PROVINSI JAWA BARAT

Reporter : ARIF HIDAYAT

Redaktur/Editor : ENDANG SUMARDI

DPU-PRP-KPP (Dines Pekerjaan Umum, Panataan Rohang, Paimahan, Kawasan Pamukiman jeung Patanahan) Kota Sukabumi, masrahkeun Program BSPS (Bantuan Stimulan Paimahan Swadaya) jeung Rutilahu (Rumah Tidak Layak Huni) Provinsi Jawa Barat, anyar-anyar ieu, di Hotél Anugrah Kota Sukabumi. Ěta bantuan téh dipasrahkeun sacara simbolis ku Wali Kota Sukabumi, H. Achmad Fahmi. Hadir dina kasempetan éta, pawakilan ti Kamentrian PUPR (Pekerjaan Umum jeung Paimahan  Rahayat), katut pawakilan ti Pamaréntah Provinsi Jawa Barat.

Dina biantarana Wali Kota Sukabumi nandeskeun, ieu program téh luyu jeung kawijakan pamaréntah puseur, pikeun ngahangkeutkeun pangwangunan.  Saterusna ngajelaskeun, dina usaha ngahangkeutkeun pangwangunan, Pamaréntah Kota Sukabumi ngabentuk forum CSR, anu ngawengku ti perbangkan jeung dunya usaha, anu panustrungannana dana CSR bisa disalurkeun tepat sasaran ka masarakat anu ngabutuhkeun, diantarana ngaliwatan program ngoméan Rutilahu.

Sedengkeun Kapala DPU-PRP-KPP Kota Sukabumi, Dr. Ir. H. Asép Irawan, M.Sc. ngajelaskeun, maksud jeung tujuan dilaksanakeunnana Program BSPS jeung Rutilahu téh, pikeun ngaronjatkeun prakarsa MBR (Masarakat Berpenghasilan Rendah), dina pangwangunan jeung ngaronjatkeun ajén imah katut prasarana jeung utilitas. Lian ti éta ogé kawangunna Rutilahu pikeun MBR, anu dirojong ku sarana, prasarana jeung utilitas umum, anu pamustungannana jadi paimahan anu séhat jeung aman, sarta genah dicicingannana.

Salajuna ngajelaskeun, jumlah imah di Kota Sukabumi anu dioméan ngaliwatan program BSPS tahun 2019, sagemblengna aya 231 imah, anu sumebar di 3 kalurahan, nya éta di Kalurahan Karang Tengah jeung Kalurahan Karamat Kacamatan Gunung Puyuh, sarta di Kalurahan Benteng Kacamatan Warudoyong.

Leave a Reply