PASANGGIRI IBING PENCA SILAT KACIDA PENTINGNA DILAKSANAKEUN

Reporter/Redaktur/Editor : ENDANG SUMARDI

Sakumaha anu ditandeskeun ku Wakil Wali Kota Sukabumi, H. Andri S. Hamami, S.H., M.H., Pasanggiri Ibing Penca Silat kacida pentingna dilaksanakeun, pikeun ngaraksa jeung ngariksa sakaligus ngalestarikeun seni tradisi penca silat sabagé kaaripan lokal. Ěta panandesan téh ditepikeun basa ngaluuhan Pasanggiri Ibing Penca Silat SDN Sindangsari, Kalurahan Sindangsari, Kacamatan  Lembursitu, Kota Sukabumi, sawatara poé ka tukang.

Hadir dina kasempetan éta, para Kapala SKPD (Satuan Kerja Parangkat Daérah), instansi jeung lembaga nu aya tumalina, para sesepuh jeung inohong penca silat, para seniman penca silat, katut para tamu ondangan lianna.

Salajuna ditandeskeun, ieu pasanggiri téh pikeun nanemkeun kacintaan para palajar kana penca silat, sakaligus pikeun ngagali poténsi jeung bakat pasilat, hususna di kalangan palajar, sabagé régenerasi pasilat di Kota Sukabumi. Salian ti éta, ogé pikeun ngarojong jeung ngahontal targét prestasi penca silat di Kota Sukabumi, sakaligus pikeun nyambuangkeun wawangi Kota Sukabumi, boh di tingkat régional boh di tingkat nasional.

Wakil Wali Kota Sukabumi ngaharepkeun, ku dilaksanakeunnana Pasanggiri Ibing Penca Silat téh, bisa numuwuhkeun jeung ngamekarkeun kacintaan masarakat Kota Sukabumi, kana seni jeung budaya penca silat. Disagigireun ti éta, ogé bisa jadi pecut jeung panghudang sumanget katut minat jeung bakat para pasilat, pikeun medalkeun para pasilat anu propésional, sarta bisa ngareueuskeun jeung ngagumbirakeun sakumna pihak, boh pamaréntah boh masarakat.

Wakil Wali Kota Sukabumi ogé ngungkabkeun, prestasi jeung kamekaran penca silat di Kota Sukabumi kacida hadé jeung gancang. Buktina sababaraha taun ka tukang, Pengcab (Pengurus Cabang) IPSI (Ikatan Penca Silat Indonésia) Kota Sukabumi, hasil ngungkulan rékor MURI (Museum Rékor Dunya Indonésia), cindekna dina atraksi Penca Silat anu lumangsung di Lapangan Sutadi Rono Dipuro Setukpa Lemdiklat Polri Sukabumi, dina raraga ngareuah-reuah jeung miéling Poé Jadi Ka 93 Kota Sukabumi Taun 2007.

Leave a Reply