WALI KOTA SUKABUMI MEUNANG LAYANG PANGAJÉN GELAR MILÉNIAL JUARA 2019

Reporter/Redaktur/Editor : ENDANG SUMARDI

Wali Kota Sukabumi, H. Achmad Fahmi, meunang deui layang pangajén, nya éta Layang Pangajén Gelar Milénial Juara 2019, ti DPD KNPI (Déwan Pangurus Daérah Komite Nasional Pamuda Indonésia) Provinsi Jawa Barat, kana dédikasi katut kontribusina dina pangwangunan kapamudaan.

Éta layang pangajén téh dipasrahkeun ku Ketua DPD KNPI Provinsi Jawa Barat, Rio Fébrian Wilantara, ka Wali Kota Sukabumi, H. Achmad Fahmi, dina acara KNPI Award 2019, di CGV Miko Mall Kota Bandung, 23 Désémber 2019.

Dina kasempetan éta, Wali Kota Sukabumi salaku Kapala Daérah katut kanca-kanca ti DPD KNPI Kota Sukabumi ngarasa reueus jeung bagja, kana pangajén anu dipasrahkeun ku DPD KNPI Provinsi Jawa Barat.

Éta layang pangajén téh baris jadi pecut jeung panghudang sumanget ka Wali Kota Sukabumi sarta Pamaréntah Kota Sukabumi katut DPD KNPI Kota Sukabumi, pikeun terus ngabdi jeung digawé dina ngaronjatkeun ajén kapamudaan di Kota Sukabumi. Sabab ku éta hal téh, pamuda di Kota Sukabumi baris leuwih ngabelesat jeung ngabogaan prestasi anu leuwih hadé dina mangsa nu bakal datang.

Salian ti éta, layang pangajén ti DPD KNPI Provinsi Jawa Barat  téh, baris leuwih nguatan kana gelar Kota Sukabumi sabagé Kota Layak Pamuda. Lantaran Kota Sukabumi téh nyangking layang pangajén sabagé Kota Layak Pamuda Kategori Pratama, ti Kemenpora (Kementrian Pamuda jeung Olahraga).

Éta layang pangajén téh ditarima langsung ku Wali Kota Sukabumi, H. Achmad Fahmi, dina acara Anugrah Kapamudaan 2019, cindekna tanggal 28 Oktober 2019, di Jakarta Concért Hall iNéws Tower, anu ngangkat téma Ngahiji Urang Maju. (Sumber Bagian Humas jeung Protokol Setda Kota Sukabumi).

Leave a Reply