KOTA SUKABUMI BOGA PASAR IKAN HIAS

Reporter/Redaktur/Editor : ENDANG SUMARDI

Pikeun masarakat Kota Sukabumi jeung sabudeureunnana anu resep miara lauk atawa ikan hias, teu kudu bingung jeung teu kudu aprak-aprakan néangan ikan hias, sabab Kota Sukabumi kiwari boga Pasar Ikan Hias, cindekna di STA (Sub Terminal Agribisnis) Bungbulang Kacamatan Cibeureum Kota Sukabumi. Tah pikeun masarakat anu rék meuli ikan hias, tinggal datang waé ka éta pasar. Sabab di éta pasar téh, disadiakeun rupa-rupa jeung jenis ikan hias.

Ěta Pasar Ikan Hias  anu dibaladah jeung ditaratas ku FISS (Forum Ikan Hias Sukabumi Raya) téh, diresmikeun ku Wakil Gubernur Jawa Barat, H. Uu Ruzhanul Ulum katut Wali Kota Sukabumi, H. Achmad Fahmi, sawatara waktu ka tukang, anu ditangaraan ku ngagunting pita.

Hadir dina kasempetan éta, Asistén Paékonomian jeung Pangwangunan Setda Kota Sukabumi, Ir. H. Cécép Mansur, M.M., para Kapala SKPD (Satuan Kerja Parangkat Daérah) katut instansi nu aya kaitannana, sarta para tamu ondangan lianna. Dina éta kasempetan téh dipintonkeun rupa-rupa jeung jenis ikan hias, diantarana Koi, Mas Koki, Cupang jeung nu séjénna.

Wakil Gubernur Jawa Barat, H. Uu Ruzhanul Ulum ngajelaskeun, Pamaréntah Provinsi Jawa Barat keur néangan poténsi wisata pikeun ngirut jeung ngadatangkeun wisatawan. Salajuna ngaharepkeun, Pasar Ikan Hias di STA Bungbulang Kacamatan Cibeureum Kota Sukabumi anu teu aya di kabupatén jeung kota séjénna, jadi sala sahiji poténsi wisata di Jawa Barat, sarta baris dirojong ku Pamaréntah Provinsi Jawa Barat.

Sedengkeun Wali Kota Sukabumi, H. Achmad Fahmi ngajelaskeun, wewengkon Kacamatan Cibeureum dina RTRW (Rancana Tata Rohang Wewengkon) ditetepkeun jadi puseur kagiatan infrastruktur, sabab baris diwangun Puseur Pamaréntahan Anyar Kota Sukabumi, lantaran Puseur Pamaréntahan Kota Sukabumi di Kacamatan Cikolé geus gegek.

Disagiireun ti éta, di Kacamatan Cibeureum ogé aya kawasan atikan Kampus IPB (Institut Patanian Bogor). Saterusna, STA Bungbulang ogé baris terus dimekarkeun, pikeun tempat ngumpulna komunitas ikan hias, sarta baris dijadikeun tempat jual beuli jeung pabinihan ikan hias di Kota Sukabumi.

Leave a Reply