PASAR NGAMPAR DI KALURAHAN JAYAMEKAR

Reporter : ARIF HIDAYAT

Redaktur/Editor : ENDANG SUMARDI

Baznas (Badan Amil Zakat Nasional) Kota Sukabumi gawé bareng jeung Kalurahan Jayamekar, Kacamatan Baros, Kota Sukabumi, nyalagarakeun Pasar Ngampar di Buruan Kantor Kalurahan Jayamekar, ngaliwatan program ZCD (Zakat Community Development). Pasar Ngampar anu dilaksanakeun 2 kali dina satiap bulan cindekna dina poé Minggu kadua jeung poé Minggu kaopat téh, dilaunching ku Wali Kota Sukabumi, H. Ahmad Fahmi, dina poé Minggu nu anyar kaliwat, anu ditangaraan ku Ngaleupaskeun Balon jeung Motong Tumpeng, sarta dieusi ku Senam Aérobic, Seminar Maca jeung Palatihan Pangalolaan Runtah Sistim Écobrick.

Sedengkeun nu hadir dina kasempetan éta, Ketua Tim Panggerak PKK Kota Sukabumi, Hj. Fitri Hayati Fahmi, para Kapala SKPD (Satuan Kerja Parangkat Daérah) jeung lembaga nu aya kaitannana, sarta para tamu ondangan lianna.

Dina biantarana Wali Kota Sukabumi ngajelaskeun, ieu Pasar Ngampar téh ngarupakeun gawé bareng antara Baznas Kota Sukabumi jeung Kalurahan Jayamekar, sakaligus ngarupakeun sala sahiji prosés pangembangan kamasarakatan, anu ngabogaan basis jeung asalna tina zakat. Salian ti éta Wali Kota Sukabumi ngaharepkeun, ku dilaksanakeunnana ieu Pasar Ngampar téh bisa ngaronjatkeun ékonomi masarakat, sarta bisa mecahkeun puseur paékonomian ti hiji wewengkon ka wewengkon-wewengkon lianna.

Salajuna ngajelaskeun, usaha ngabardayakeun masarakat anu dilaksanakeun ku Baznas Kota Sukabumi téh, lain ukur ngeunaan pangampingan wungkul, tapi ogé disiapkeun pamasarannana. Sedengkeun sala sahiji alesan Baznas Kota Sukabumi nyalagarakeun Pasar Ngampar téh, nya éta pikeun muka pasar di wewengkon-wewengkon lianna di Kota Sukabumi. Saterusna ngaharepkeun, ka hareup modél Pasar Ngampar téh bisa dimekarkeun ka wewengkon-wewengkon lianna di Koa Sukabumi, pikeun numuwuhkeun wewengkon jeung ngagerakeun roda ékonomi masarakat.

Sedengkeun Ketua Baznas Kota Sukabumi, Ir. H. Fifi Kusumajaya, M.M. ngajelaskeun, program ZCD téh pikeun ngabardayakeun widang kamasarakatan, ékonomi, atikan jeung kaséhatan sarta wawasan lingkungan. Disagigireun ti éta ogé ngaharepkeun, ku dilaksanakeunnana Pasar Ngampar di Kalurahan Jayamekar téh, bisa jadi destinasi wisata unggulan hususna wisata kulinér di Kota Sukabumi.

Leave a Reply