ACARA NGABAGÉAKEUN TAUN 2020 DI KOTA SUKABUMI LUMANGSUNG LANCAR JEUNG AMAN

Reporter/Redaktur/Editor : ENDANG SUMARDI

Acara Ngalepas Taun 2019 jeung Ngabagéakeun Taun 2020, di Kota Sukabumi dina umumna lumangsung lancar jeung aman. Éta hal téh bisa ngawujud, ku usaha jeung gawé rancagé sakumna pihak, hususna kasiap-siagaan jeung kaparigelan sakumna aparat kaamanan, boh Polri katut TNI boh Sipil, dina ngajalankeun pancén pangamanan.

Disagigireun ti éta, ogé ku ngaronjatna kasadaran sakumna lapisan masarakat, dina ngajaga sakaligus ngaronjatkeun kaamanan, katengtreman jeung kaayeman, ku cara salawasna patuh jeung taat kana sagala rupa aturan jeung undang-undang anu ditetepkeun.

Sedengkeun kagiatan anu dilaksanakeun dina raraga Ngalepas Taun 2019 jeung Ngabagéakeun Taun 2020, diantarana Kamus (Kajian Muslimah) Akbar Ahir Taun 2019, di Masjid Agung Kota Sukabumi, anu dicalagarakeun ku Pamaréntah Kota Sukabumi jeung DKM Masjid Agung Kota Sukabumi.

Salajuna Apél Siaga Oprasi Lilin Lodaya Pangamanan Malem Ngalepas Taun 2019 jeung Ngabagéakeun Taun 2020, di Gedong Juang 45 Kota Sukabumi, sarta Tablég Akbar Kota Sukabumi Ngalaksanakeun Muhasabah, ku K.H. Yayat Ruhiyat Ar – Rasyid, ti Rumah Tahfidz Al – Qur’an Kabupatén Garut, di Masjid Agung Kota Sukabumi.

Salian ti éta ogé dilaksanakeun panalingaan jeung paniténan ku Wali Kota Sukabumi, H. Achmad Fahmi, Wakil Wali Kota Sukabumi, H. Andri S. Hamami, S.H., M.H., Kapolres Sukabumi Kota, AKBP Wisnu Prabowo, Dandim 0607 Kota Sukabumi, Létkol Inf. Danang Prasetyo Wibowo, Pingpinan katut Anggota DPRD, Sekertaris Daérah Kota Sukabumi, Drs. H. Dida Sembada, M.M., para Asistén Setda Kota Sukabumi, sata para Kapala OPD (Organisasi Parangkat Daérah) katut instansi nu aya kaitannana, ka sajumlah tempat jeung Pos Pangamanan di sabudeureun Tugu Adipura jeung Lapangan Merdéka Kota Sukabumi.

Wali Kota Sukabumi ngahaturkeun nuhun katut pangajén anu saluhur-luhurna ka sakumna pihak, utamana ka sakumna aparat kaamanan, anu salawasna siap-siaga jeung parigel dina ngalaksanakeun tugas pangamanan. Kitu deui ka sakumna lapisan masarakat, anu salawasna usaha ngajaga sakaligus ngaronjatkeun kaamanan, katengtreman jeung kaayeman, anu panustrungannana acara Ngalepas Taun 2019 jeung Ngabagéakeun Taun 2020, di Kota Sukabumi dina umumna lumangsung lancar jeung aman.

Leave a Reply