SAKUMNA ASN SANGKAN NGARONJATKEUN SABILULUNGAN JEUNG KAKOMPAKAN

Reporter/Redaktur/Editor : ENDANG SUMARDI

Wali Kota Sukabumi, H. Achmad Fahmi, ngaharepkeun ka sakumna ASN (Aparatur Sipil Nagara) di lingkungan Pamaréntah Kota Sukabumi, dina ngamimitian nyorang taun 2020, sangkan salawasna ngajaga sakaligus ngaronjatkeun sabilulungan jeung kakompakan, dina ngawangun Kota Sukabumi ka nu leuwih hadé deui.

Éta harepan téh ditepikeun dina biantara, basa mingpin apél poé munggaran asup gawé ASN taun 2020, di lingkungan Setda Kota Sukabumi, kaasup Diskominfo (Dines Komunikasi jeung Informatika), Bappeda (Badan Parancanaan Pangwangunan Daérah) katut Dispusip (Dines Perpustakaan jeung Kaarsipan), di Buruan Apél Setda Kota Sukabumi, cindekna dina poé Kemis, 2 Januari 2020 nu anyar kaliwat.

Hadir dina kasempetan éta, Wakil Wali Kota Sukabumi, H. Andri S. Hamami, S.H., M.H., Sekertaris Daérah Kota Sukabumi, Drs. H. Dida Sembada, M.M., para Asistén Setda Kota Sukabumi, para Kapala Dines, Badan jeung Bagian, sarta para Camat jeung Lurah sa Kota Sukabumi.

Salajuna Wali Kota Sukabumi ngahaturkeun nuhun katut muji sukur ka Nu Maha Agung, bisa silaturahmi dina kaayaan sabilulungan jeung kaakraban, sarta kahadéan jeung kaberkahan dina ngamimitian nyorang taun 2020.

Lian ti éta ogé ngajelaskeun, salila 365 poé dina taun 2019 anu geus diliwatan jeung disorang babarengan, aya hal anu nyugemakeun, ngagumbirakeun, nyenangkeun jeung ngabahagiakeun, disagigireun aya hal anu can luyu jeung harepan sakumna pihak.

Anapon hal anu nyugemakeun kacida réana, boh sacara pribadi boh sacara kelembagaan. Sedengkeun hal anu can luyu jeung harepan sakumna pihak, sangkan diévaluasi jeung dioméan, supaya bisa hadé jeung leuwih hadé.

Saterusna ngajelaskeun, dina mangsa mungkas taun 2019 jeung ngamimitian taun 2020, wewengkon Kota Sukabumi dina kaayaan aman, tengtrem jeung ayem. Éta hal téh bisa ngawujud,. ku ayana usaha jeung alpukahna sakumna pihak, hususna aparat kaamanan, boh Polri katut TNI boh Sipil, anu salawasna siap-siaga jeung sigep dina ngalaksanakeun tugas pangamanan.

Leave a Reply