WALI KOTA SUKABUMI NGALUNCURKEUN PAKÉT KAWIJAKAN SANITASI

Reporter : ARIF HIDAYAT

Redaktur/Editor : ENDANG SUMARDI

Wali Kota Sukabumi, H. Achmad Fahmi, ngaluncurkeun pakét kawijakan sanitasi Kota Sukabumi, dina kagiatan implementasi SSK (Strategi Sanitasi Kota) PPSP (Program Percepatan Sanitasi Permukiman), ngaliwatan program Gesit Pisan (Gerakan Sukabumi Tuntaskan Pengolahan Air Limbah Doméstik jeung Sampah Berkelanjutan), anyar-anyar ieu, di Hotél Maxone Kota Sukabumi.

Hadir dina kasempetan éta, Sekertaris Daérah Kota Sukabumi, Drs. H. Dida Sembada, M.M., para Kapala OPD (Organisasi Parangkat Daérah) jeung instansi nu aya kaitannana, unsur Bappeda (Badan Parancanaan Pangwangunan Daerah) Provinsi Jawa Barat, unsur komunitas jeung para tamu ondangan lianna.

Dina biantarana, Wali Kota Sukabumi nandeskeun, sanitasi ngarupakeun PR pikeun sakumna kota di Indonésia, sabab kudu diwangun sacara daria, dina raraga usaha ngawujudkeun hirup séhat jeung bersih. Ku sabab kitu, Pamaréntah Kota Sukabumi ngaluncurkeun pakét éta kawijakan ngaliwatan program Gesit Pisan, anu ngawengku ti program Cipélang Hérang, nya éta Panataan Wahangan Cipélang Héjo Alamna Raos Tempatna Ngagenclang Caina). Saterusna program Kasihku (Kawasan Bersih Kota Sukabumiku), Ngalegaan TPA (Tempat Pamiceunan Ahir) Runtah katut TPA Runtah Babarengan jeung Kabupatén Sukabumi, Panyadiaan Jas Nyamuk (Jamban Séhat jeung Nyaman Untuk Keluarga), Révitaliasi jeung Optimalisasi IPLT (Instalasi Pengolahan Air Lumpur Tinja), sarta Pesan Daku (Pangalolaan Sanitasi ngaliwatan Dana Kalurahan).

Sedengkeun Kapala Widang Fisik Bappeda Kota Sukabumi, H.R. Imran Whardhani, A.Md.LLAJ., S.IP., M.Si. ngajelaskeun, maksud jeung tujuan dilaksanakeunnana ieu kagiatan téh, nya éta pasamoan jeung silaturahmi antara insan-insan panggerak pangwangunan sanitasi di Kota Sukabumi, sakaligus sosialisasi jeung kampanyeu pakét-pakét kawijakan pangwangunan sanitasi di Kota Sukabumi, sarta ngumpulkeun kakuatan babarengan jeung masarakat, pikeun ngawujudkeun sanitasi anu hadé jeung terus-terusan.

Dina éta kagiatan téh dilaksanakeun panandatanganan, dina raraga ngarojong jeung komitmen babarengan, pikeun ngawujudkeun pakét kawijakan program Gesit Pisan, ku Wali Kota Sukabumi, Sekertaris Daérah Kota Sukabumi, para Kapala OPD jeung para tamu ondangan lianna.

Leave a Reply