DINES TANAGA KERJA KOTA SUKABUMI BARIS NYALAGARAKEUN RUPA-RUPA PALATIHAN GAWÉ

Reporter : RIKSAN SATYAPRAWIRA

Redaktur/Editor : ENDANG SUMARDI

Dines Tanaga Kerja Kota Sukabumi, dina taun 2020 baris nyalagarakeun rupa-rupa palatihan gawé, pikeun nu néangan gawé. Diantarana palatihan gawé widang tata boga, tata rias, otomotif, public spéaking jeung budidaya lauk. Éta hal téh diungkabkeun ku Kapala Dines Tanaga Kerja Kota Sukabumi, Drs. H. Didin Syarifudin, M.Si., dina rapat pasiapan panyalagaraan éta palatihan, anu dilaksanakeun di Dines Tanaga Kerja Kota Sukabumi, anyar-anyar ieu.

Anapon maksud jeung tujuan dilaksanakeunnana éta palatihan gawé téh, dina raraga usaha pikeun ngurangan angka anu ngaligeuh di Kota Sukabumi. Salajuna dijelaskeun, dina panyalagaraan éta palatihan gawé téh,. pihak Dines Tanaga Kerja Kota Sukabumi baris ngalaksanakeun gawé bareng jeung Dines lianna, LPK, Institusi jeung Komunitas.

Lian ti éta ogé dijelaskeun, dina panyalagaraan palatihan gawé taun 2020, pihak Dines Tanaga Kerja Kota Sukabumi baris nitikbeuratkeun kana pangwangunan jiwa énterpreneurship atawa kawirausahaan. Maksud jeung tujuannana, supaya saréngséna palatihan téh, para pamilon lain ngan saukur bisa digawé di pausahaan, tapi bisa muka usaha sorangan sacara mandiri.

Kapala Dines Tanaga Kerja Kota Sukabumi ngajelaskeun, saméméh ngalaksanakeun éta palatihan téh, pihakna baris ngalaksanakeun heula sosialisasi ka 7 Kacamatan sa Kota Sukabumi, pikeun nyaring calon pamilon palatihan, anu rarancangna baris dilaksanakeun dina bulan Fébruari 2020.

Leave a Reply