WALI KOTA SUKABUMI NGALUUHAN RAKER PANYUSUNAN LPPD TAUN  2020

Reporter/Redaktur/Editor : ENDANG SUMARDI

Wali Kota Sukabumi, H. Achmad Fahmi, dibarengan ku Asistén Pamaréntahan Setda Kota Sukabumi, Drs. H. Andri Setiawan, M.M., katut Kapala Bagian Tata Pamaréntahan Setda Kota Sukabumi, Téjo Condro Nugroho, A.P., M.T., ngaluuhan Raker (Rapat Kerja) Panyusunan LPPD (Laporan Panyalagaraan Pamaréntah Daérah) Taun  2020. Raker anu lumangsung di Gedong Saté Provinsi Jawa Barat, anyar-anyar ieu téh, dibuka ku Gubernur Jawa Barat, Ridwan Kamil.

Dina éta kasempetan, Gubernur Jawa Barat meredih sakaligus ngadorong paningkatan kinerja pamaréntah, dina méré palayanan ka masarakat. Salajuna Gubernur Jawa Barat nandeskeun peran strategis LPPD pikeun Kapala Daérah, nya éta bisa ngukur hasil panyalagaraan urusan pamaréntahan sarta bahan panyusunan program jeung anggaran. Salian ti éta, LPPD ogé aya kaitannana jeung SPM (Standar Palayanan Minimal) jeung LAKIP (Laporan Akuntabilitas Kinerja Instansi Pamaréntahan).

Sedengkeun Wali Kota Sukabumi, H. Achmad Fahmi nandeskeun, Pamaréntah Kota Sukabumi ngabogaan komitmen ngaronjatkeun palayanan pamaréntahan anu hadé ka masarakat. Saterusna ditandeskeun, LPPD jadi bagian penting dina ngukur hasil panyalagaraan pamaréntahan. Disagigireun ti éta ogé ditandeskeun, hasil pangwangunan mangpaatna kudu bisa dirasakeun ku masarakat. Ku kituna, Pamaréntah Kota Sukabumi geus ngaluncurkeun rupa-rupa program unggulan jeung geus lumangsung. Diantarana program homé caré, pikeun ngabantu masarakat anu katarajang kasakit, tapi teu bisa datang ka fasilitas kaséhatan, kaasup kalangan Lansia (Lanjut Usia).

Saterusna dijelaskeun, éta masarakat téh didatangan sakaligus dipariksa jeung diobatan ku parawat di padumukannana masing-masing. Lian ti éta ogé dijelaskeun, salila jangka waktu ti bulan Januari nepi ka bulan Novémber 2019 nu geus kaliwat, total pasén atawa masarakat anu dilayanan ngaliwatan program homé caré téh ngahontal 1.232 urang. Ěta jumlah téh tacan ditambah ku palayanan dina bulan Désémber 2019, anu dina danget masih didata. Leuwih jauh dijelaskeun, éta rébuan pasén téh asalna ti 15 Pukesmas sa Kota Sukabumi. Disagédéngeun ti éta, ogé masih réa program unggulan lianna, anu ngabantu langsung kabutuhan masarakat. (Sumber Bagian Humas dan Protokol Setda Kota Sukabumi).

Leave a Reply