IMAH MILIK UJANG ANU RUNTUH AKIBAT CUACA ÉKSTRIM BARIS DIWANGUN DEUI

Reporter : SITI ASHFIASARI

Redaktur/Editor : ENDANG SUMARDI

Imah milik Ujang warga Kalurahan Subangjaya, Kacamatan Cikolé, Kota Sukabumi, anu runtuh akibat cuaca ékstrim nya éta hujan badag jeung angin kenceng, cindekna tanggal 21 Januari 2020, baris diwangun deui. Nurutkeun nu boga eta imah, Ujang, yén wangunan imahna téh geus bobo, anu pamustungannana dina mangsa turun hujan badag jeung angin kenceng imahna runtuh. Tapi untungna dina éta musibah téh taya korban jiwa.

Camat Cikolé, H. Ayi Jamiat, S.STP., M.Si. ngajelaskeun, aparat satempat katut masarakat nu aya di sabudeureunnana, kaasup BPBD (Badan Pananggulangan Bencana Daérah) Kota Sukabumi, dina mangsa éta kénéh langsung ngaévakuasi pangeusi éta imah ka imah kulawargana.

Salian ti éta, pihak Pamaréntah Kacamatan Cikolé, Kalurahan Subangjaya sarta RW jeung RT katut masarakat satempat, baris usaha satékah plolah ngawangun deui éta imah ku cara swadaya,  nya éta réreongan jeung gotong royong.

Salajuna dina ngumpulkeun waragad pikeun ngawangun deui éta imah téh, pihakna baris gawé bareng jeung Dines Sosial Kota Sukabumi, ngaliwatan program Udunan Onliné, kaasup jeung Baznas (Badan Amil Zakat Nasional) Kota Sukabumi.

Anapon waragad pikeun ngawangun deui éta imah téh, numutkeun Camat Cikolé, dikira-kira gedéna Rp. 10 juta. Sedengkeun bantuan anu geus ditarima, nya éta ti PMI (Palang Mérah Indonésia) Kota Sukabumi.

Saterusna, Camat Cikolé cumeluk sakaligus meredih ka sakumna pihak, boh ka aparat boh ka masarakat, sangkan ilubiung jeung sabilulungan ngabantu ngawangun deui éta imah, ku cara réréongan jeung gotong royong.

Leave a Reply