SALAWASNA USAHA NGALAKSANAKEUN GAWÉ BARENG DINA NGAMEKARKEUN ÉKONOMI

Reporter/Redaktur/Editor : ENDANG SUMARDI

Wakil Wali Kota Sukabumi, H. Andri S. Hamami, S.H., M.H. nandeskeun, Pamaréntah Kota Sukabumi salawasna usaha satékah polah ngalaksanakeun gawé bareng dina ngamekarkeun ékonomi. Sabab di Kota Sukabumi keur digedurkeun program Sukabumi Kécé (Kalurahan Ěntrepreneurship Cénter), pikeun ngabentuk para palaku atawa pangusaha anyar, nuju Kota Sukabumi anu Renyah (Réligieus, Nyaman jeung Sajahtra).

Panandesan Wakil Wali Kota Sukabumi éta téh, ditepikeun basa ngaluuhan Kunker (Kunjungan Kerja) Mentri Désa, Pembangunan  Daérah Tertinggal jeung Transmigrasi, Abdul Halim Iskandar, katut Dubes (Duta Besar) Républik Ra’yat Tiongkok pikeun Républik Indonésia, Mr. Xiao Qian, ka Désa Sukajaya, Kacamatan Sukabumi, Kabupatén Sukabumi, anyar-anyar ieu.

Dina kasempetan éta hadir Bupati Sukabumi, H. Marwan Hamami, sarta para Kapala OPD (Organisasi Parangkat Daérah) jeung instansi nu aya kaitannana di lingkungan Pamaréntah Kabupatén Sukabumi, pikeun nguntun gawé bareng dina widang patanian di Kabupatén Sukabumi.

Salain ti éta, Wakil Wali Kota Sukabumi ngabagéakeun kana ayana éta kunker jeung gawé bareng téh, sabab baris aya pangaruhna ka Kota Sukabumi, sabagé tatangga Kabupatén Sukabumi.

Salajuna Wakil Wali Kota Sukabumi ngajelaskeun, sala sahiji indikator suksésna pangwangunan téh nya éta tumuwuhna ékonomi, sarta turunna angka anu ngaligeuh jeung ayana lapangan gawé. Tumuwuhna ékonomi téh ditandaan ku ngaronjatna ékonomi masarakat, anu ngabogaan pangaruh kana ngaronjatna pangasilan daérah, nuju paékonomian ka nu leuwih hadé deui.

Disagigireun ti éta ogé dijelaskeun, masalah anu ngaligeuh jeung panyadiaan lapangan gawé téh, ngarupakeun sala sahiji tanggung jawab pamaréntah jeung sakumna pamangku kapentingan.

Leave a Reply