WALI KOTA SUKABUMI NGALUNCURKEUN GERAKAN DAHAR ENDOG JEUNG DAGING HAYAM

Reporter/Redaktur/Editor : ENDANG SUMARDI

Wali Kota Sukabumi, H. Achmad Fahmi, anyar-anyar ieu ngaluncurkeun Gerakan Dahar Endog jeung Daging Hayam, di Posyandu Gatot Kaca, Jalan Kolébérés Selaeurih, Kalurahan Dayeuhluhur, Kacamatan Warudoyong, Kota Sukabumi. Hadir dina kasempetan éta, Ketua Tim Panggerak PKK Kota Sukabumi, Hj. Fitri Hayati Fahmi, para Kapala SKPD (Satuan Kerja Parangkat Daérah) jeung instansi nu aya tumalina, sarta para tamu ondangan lianna.

Dina éta gerakan téh, Pamaréntah Kota Sukabumi meunang bantuan CSR ti Distributor Endog Hayam PT Silga Perkasa réana 12 peti, anu eusina masing-masing 200 endog atawa totalna 2.400 endog sataun.

Saterusna dijelaskeun, dina éta gerakan téh, satiap Posyandu meunang sapeti endog hayam, sarta satiap budak masing-masing meunang 2 endog. Lian ti éta ogé dijelaskeun, dilaksanakeunnana ieu gerakan téh pikeun méré gizi, nya éta mangrupa protéin héwani endog hayam ka barudak.

Wali Kota Sukabumi ngaharepkeun, ku dilaksanakeunana ieu gerakan téh, barudak di Kota Sukabumi bisa mekar sacara hadé, sarta normal jeung séhat. Disagigireun ti éta, ogé bisa ngabébaskeun Kota Sukabumi tina kasus stunting, anu diakibatkeun ku kurangna gizi.

Sedengkeun Kapala DKP3 (Dines Katahanan Pangan, Patanian jeung Paikanan) Kota Sukabumi, Ir. Hj. Kardina Karsoédi, M.T. ngajelaskeun, dina ieu Gerakan Dahar Endog téh, Pamaréntah Kota Sukabumi meunang bantuan CSR mangrupa Endog Hayam, ti Distributor Endog Hayam PT Silga Perkasa, anu dipasrahkeun satiap bulan sakali, nya éta dina poé Rebo atawa Saptu. Salajuna dijelaskeun, éta bantuan CSR Endog Hayam téh, disalurkeun ngaliwatan Pamaréntah Kota Sukabumi, anu saterusna disalurkeun deui ka masarakat ngaliwatan Posyandu.

Leave a Reply