PARA PANGUSAHA JADI BAGIAN PENTING DINA PANGHANGKEUTAN ÉKONOMI DAÉRAH

Reporter/Redaktur/Editor : ENDANG SUMARDI

Sakumaha anu ditandeskeun ku Wali Kota Sukabumi, H. Achmad Fahmi, para pangusaha jadi bagian penting dina panghangkeutan jeung tumuwuhna ékonomi daérah. Komo deui Kota Sukabumi ngabogaan poténsi UKM (Usaha Kecil jeung Menengah) sarta ékonomi kréatif, anu bisa ngadorong kana kamekaran ékonomi masarakat. Panandesan éta téh ditepikeun basa muka Diklatcab (Pendidikan jeung Palatihan Cabang), Rakercab (Rapat Kerja Cabang) jeung Forum Bisnis Hipmi (Himpunan Pangusaha Muda Indonésia) BPC (Badan Pangarus Cabang) Kota Sukabumi, di Hotél Balcony Kota Sukabumi, anyar-anyar ieu.

Dina kasempetan éta hadir Wakil Wali Kota Sukabumi, H. Andri S. Hamami, S.H., M.H., para Kapala OPD (Organisasi Parangkat Daérah) katut instansi nu aya tumalina, pawakilan Hipmi Provinsi Jawa Barat, sarta para tamu ondangan lianna.

Wali Kota Sukabumi ngajelaskeun, Hipmi bagian tina Péntahélix ABCGM, nya éta Akademisi, Bisnis, Comunitas, Government jeung Média), anu mampuh ngalaksanakeun panghangkeutan jeung tumuwuhna ékonomi. Ngan éta hal téh kudu dirojong ku poténsi UKM jeung ékonomi kréatif, anu jadi bagian dina ngaronjatkeun ajén pangusaha.

Saterusna ngajelaskeun, katahanan nasional kacida gumantungna kana kaayaan ékonomi. Salian ti éta, dina mangsa ékonomi bangsa hadé jeung mekar anu ditandaan ku para pangusaha aktif, sacara otomatis angka anu ngaligeuh ngurangan jeung angka kriminalitas ogé ngurangan. Salajuna ngaharepkeun, para pangusaha kudu terus aktif nyiptakeun inovasi, supaya ékonomi bisa terus tumuwuh jeung mekar.

Disagédéngeun ti éta, kamekaran téknologi ogé kudu dimangpaatkeun sacara maksimal, dina raraga panghangkeutan  pangwangunan ékonomi. Wali Kota Sukabumi ogé ngajelaskeun, Kota Sukabumi ngabogaan réa poténsi jeung sesepuh pangusaha. Ku sabab kitu, taya alesan pikeun Hipmi lambat ngalaksanakeun pagerakan. Salajuna ngajelaskeun, rupa-rupa sarana jeung poténsi bisa dimangpaatkeun sacara optimal, ku cara sabilulungan jeung sakumna SKPD (Satuan Kerja Parangkat Daérah) katut instansi nu aya kaitannana, kaasup jeung sakumna élemén masarakat.

Leave a Reply