PERAN PANGAWAS SAKOLA KACIDA PENTINGNA DINA PANGWANGUNAN ATIKAN

Reporter/Redaktur/Editor : ENDANG SUMARDI

Wali Kota Sukabumi, H. Achmad Fahmi nandeskeun, peran Pangawas Sakola kacida pentingna dina pangwangunan atikan. Ěta panandesan téh ditepikeun bada narima Kunker (Kunjungan Kerja) APSI (Asosiasi Pangawas Sakola Indonésia) Kota Sukabumi, di Rohangan Utama Balé Kota Sukabumi, sawatara poé ka tukang. Hadir dina kasempetan éta, Asistén Pamaréntahan Setda Kota Sukabumi, Drs. H. Andri Setiawan, M.M.

Salian ti éta, Wali Kota Sukabumi kalayan asmana Pamaréntah Kota Sukabumi, kacida ngabagéakeunnana kana ayana kunker APSI Kota Sukabumi téh, sakaligus méré kamandang ngeunaan pangwangunan atikan. Ku sabab kitu, ieu kunker téh jadi forum nepikeun sacara langsung masalah paningkatan pangwangunan jeung ajén atikan anu hadé hususna di Kota Sukabumi.

Ku kituna, rupa-rupa kamandang jeung ideu anu ditepikeun ku APSI Kota Sukabumi téh, baris dijadikeun bahan kawijakan dina ngaronjatkeun ajén jeung dina netepkeun regulasi ngeunaan pangwangunan atikan di Kota Sukabumi sacara babarengan. Disagigireun ti éta, Wali Kota Sukabumi ogé meredih ka APSI Kota Sukabumi, sangkan ngalaksanakeun kajian jeung analisa ngeunaan paningkatan ajén jeung pangwangunan atikan, supaya ka hareupna bisa leuwih hadé deui.

Salajuna dijelaskeun, usaha dina ngalibetkeun sakumna élemén masarakat kacida diperlukeunnana, supaya dinamika jeung pangwangunan atikan bisa mekar jeung gancang. Komo deui Kamentrian Pendidikan keur ngalaksanakeun panataan jeung panghangkeutan pangwangunan atikan. Lian ti éta ogé dijelaskeun, Persidén ngaamanatkeun ka sakumna daérah, sangkan ngalakasanakeun  panghangkeutan pangwangunan infrastrukur, inovasi atikan jeung réformasi birokrasi. Pikeun inovasi atikan, sala sahijina bisa dilaksanakeun ku para Pangawas Sakola, hususna dina ngadorong ajén lulusan sakola anu hadé.

Sedengkeun Ketua APSI Kota Sukabumi, Suwanti ngajelaskeun, para Pangawas Sakola di Kota Sukabumi siap jadi bagian dina pangwangunan jeung paningkatan ajén atikan anu hadé, pikeun ngalahirkeun SDM (Sumber Daya Manusa) anu ngabogaan ajén hadé.

Leave a Reply