PAMARÉNTAH KOTA SUKABUMI MEUNANG DEUI LAYANG PANGAJÉN TI KEMENKUMHAM RI

Reporter/Redaktur/Editor : ENDANG SUMARDI

Pamaréntah Kota Sukabumi meunang deui layang pangajén ti Kemenkumham (Kementrian Hukum jeung Hak Asasi Manusa) RI, kana pangrojong jeung méré hibah tanah ka Kantor Imigrasi Kelas II Non TPI Sukabumi salega 5.091 méter pasagi. Ěta layang pangajén téh dipasrahkeun ku Mentri Hukum jeung HAM RI, Yasonna Laoly, ka Wali Kota Sukabumi, H. Achmad Fahmi, dina acara Pangéling-ngéling Poé Bhakti Ka 70 Imigrasi Taun 2020, di Kemenkumham Jakarta, 27 Januari 2020.

Tanah hibah anu dipasrahkeun ku Pamaréntah Kota Sukabumi ka éta Kantor Imigrasi téh, cindekna di Jalan Lingkar Selatan Kota Sukabumi Nomer 7, Kalurahan Sudajaya Hilir, Kacamatan Baros, Kota Sukabumi. Sedengkeun panandatanganan naskah pajangjian jeung berita acara sérén sumérén éta tanah hibah téh, dilaksanakeun ku Wali Kota Sukabumi katut Kapala Kantor Imigrasi Kelas II Non TPI Sukabumi, Nurudin, dina tanggal 14 Oktober 2019 nu geus kaliwat.

Wali Kota Sukabumi ngajelaskeun, éta hibah tanah téh geus lawas dianti, nya éta salila 17 taun, sabagé bagian gawé bareng Pamaréntah Kota Sukabumi jeung Kantor Imigrasi Kelas II Sukabumi. Lian ti éta ogé dijelaskeun, ku ditarimana éta layang pangajén téh, bisa ngaonjatkeun jeung nguatan gawé bareng Pamaréntah Kota Sukabumi jeung Kantor Imigrasi Kelas II Sukabumi.

Wali Kota Sukabumi ngaharepkeun, ku ayana éta hibah tanah téh bisa ngaronjatkeun ajén gawé jeung palayanan Kantor Imigrasi Kelas II Sukabumi ka masarakat ka nu leuwih hadé deui, sarta Kantor Imigrasi Kelas II Sukabumi bisa naék kelas, pikeun mapag panghangkeutan infrastruktur ku Pamaréntah Puseur ka Sukabumi. Wali Kota Sukabumi ogé ngajelaskeun, dina mangsa masarakat ngarasa sugema ku palayanan anu dilaksanakeun ku Kantor Imigrasi Kelas II Sukabumi, arinyana ogé baris ngarasa sugema ku palayanan Pamaréntah Kota Sukabumi.

Leave a Reply