WALI KOTA SUKABUMI NITÉNAN PROSÉS PANGWANGUNAN PUSKESMAS BAROS

Reporter/Redaktur/Editor : ENDANG SUMARDI

Wali Kota Sukabumi, H. Achmad Fahmi, dibarengan ku Wakil Ketua DPRD Kota Sukabumi, Wawan Juanda, Anggota DPRD Kota Sukabumi, Dini Bayu Subagio, katut Sekertaris Dines Kaséhatan Kota Sukabumi, Yudi Yustiawan, anyar-anyar ieu niténan prosés pangwangunan Puskesmas Baros, Kacamatan Baros, Kota Sukabumi.

Dina kasempetan éta Wali Kota Sukabumi ngajelaskeun, tina hasil paniténan, éta fasilitas kaséhatan anu cukup agréng téh, diajén geus siap digunakeun dina bulan Fébruari 2020, lantaran tahapan pangwangunannana geus ngahontal 99 peresén.

Ieu wangunan Pukesmas téh dina bulan Fébruari 2020 diharepkeun bisa disérén-sumérénkeun jeung digunakeun, malar palayanan kaséhatan ka masarakat bisa dilaksanakeun di éta tempat atawa di éta wangunan Puskesmas.

Wali Kota Sukabumi ogé ngajelaskeun, pangwangunan éta Pukesmas téh sawatara poé ka tukang sempet ramé dina média sosial. Ngan sanggeus dititénan, pangwangunan éta Pukesmas téh lumangsung hadé.

Lian ti éta ogé ngajelaskeun, pangwangunan éta Puskesmas téh sabagé sala sahiji jangji Pamaréntah Kota Sukabumi, yén wewengkon Baros téh baris dironjatkeun, boh fisik boh non fisik, kaasup palayanan jeung status Puskesmasna.

Salajuna Wali Kota Sukabumi ngaharepkeun, éta Puskesmas téh bisa jadi RS (Rumah Sakit) Almulk kadua, dina palayanan kaséhatan ka masarakat, anu panustrungannana bisa mingkin ngagampangkeun masarakat dina ngadongkang palayanan kaséhatan anu leuwih hadé deui.

Leave a Reply