PAMARÉNTAH KOTA SUKABUMI MEUNANG DEUI LAYANG PANGAJÉN AKUNTABILITAS KINERJA TAUN 2019

Reporter/Redaktur/Editor : ENDANG SUMARDI

Pamaréntah Kota Sukabumi, meunang deui Layang Pangajén Akuntabilitas Kinerja Taun 2019 anu prédikatna BB, ti KemenPAN-RB (Kementrian Pandayagunaan Aparatur Nagara jeung Réformasi Birokrasi) RI. Ěta Layang Pangajén téh dipasrahkeun ku MenPAN-RB (Mentri Pandayagunaan Aparatur Nagara jeung Réformasi Birokrasi) RI, Tjahjo Kumolo, ka Wali Kota Sukabumi, H. Achmad Fahmi, cindekna tanggal 10 Fébruari 2020, di Hotél Radisson, Kota Batam, Provinsi Kapulowan Riow, dina kagiatan évaluasi SAKIP (Sistim Akuntabilitas Kinerja Instansi Pamaréntah) Taun 2019.

Wali Kota Sukabumi, H. Achmad Fahmi, dibarengan ku Sekertaris Daérah Kota Sukabumi, Drs. H. Dida Sembada, M.M. ngajelaskeun, dina évaluasi SAKIP Taun 2019 téh, Pamaréntah Kota Sukabumi meunang prédikat BB sarua jeung taun 2018. Sedengkeun ajén SAKIP Pamaréntah Kota Sukabumi dina taun 2019 ngahontal 76,07, ngarandapan undak tina ajén SAKIP taun 2018 anu ngahontal 74,83.

Salajuna ngajelaskeun, ku undakna éta ajén SAKIP téh, jadi tangtangan jeung jadi pecut pikeun Pamaréntah Kota Sukabumi, sakaligus ngaharepkeun, dina taun nu bakal datang prédikat SAKIP Pamaréntah Kota Sukabumi bisa ngaronjat tina BB jadi A.

Salian ti éta ogé ngajelaskeun, undakna ajén SAKIP Pamaréntah Kota Sukabumi taun 2019 téh jadi pangajaran, utamana dina ngaronjatkeun disiplin jeung gawé bareng sarta dina nyieun parancanaan, palaksanaan jeung panganggaran anu éféktif jeung éfisien. Lantaran ku éta hal téh, kabutuhan masarakat bisa dilayanan sahadé-hadéna.

Saterusna Wali Kota Sukabumi kalayan asmana Pamaréntah Kota Sukabumi, ngahaturkeun nuhun katut layang pangajén anu saluhur-luhurna ka sakumna SKPD (Satuan Kerja Parangkat Daérah), kana gawé rancagé jeung gawé barengna dina ngaronjatkeun ajén SAKIP, anu panustrungannana ajén SAKIP Pamaréntah Kota Sukabumi téh, dina taun 2019 ngaronjat nya éta jadi 76,07 anu prédikatna BB. (Sumber Bagian Humas dan Protokol Setda Kota Sukabumi).

Leave a Reply