KOTA SUKABUMI DIJADIKEUN PROYÉK PACONTOHAN NASIONAL PANINGKATAN TATA KALOLA JALAN DAÉRAH

Reporter/Redaktur/Editor : ENDANG SUMARDI

Kota Sukabumi jadi sala sahiji tina dua daérah di Indonésia, anu dijadikeun proyék pacontohan nasional paningkatan tata kalola jalan daérah. Ěta proyék pacontohan nasional téh, ngarupakeun hasil gawé bareng antara Kamentrian PUPR (Pekerjaan Umum jeung Paimahan Rahayat), jeung JICA (Japan International Cooperation Agéncy). Pikeun ngawujudkeun éta program téh, geus dilaksanakeun work shop munggaran, anyar-anyar ieu, di Rohangan Utama Balé Kota Sukabumi.

Hadir dina kasempetan éta, Wakil Wali Kota Sukabumi, H. Andri S. Hamami, S.H., M.H., Kapala Pusat Fasilitasi jeung Infrastruktur Daérah Kamentrian PUPR, Riono Suprapto, pawakilan JICA, Mr. Kawabata, para Kapala OPD (Organisasi Parangkat Daérah) jeung instansi nu aya tumalina, sarta para tamu ondangan lianna.

Dina kasempetan éta, Wakil Wali Kota Sukabumi ngucapkeun sukur, yén Kota Sukabumi kapilih jadi sala sahiji tina dua daérah di Indonésia, anu dijadikeun pilot projéct atawa proyék pacontohan nasional paningkatan tata kalola jalan daérah, dina raraga méré jeung ngaronjatkeun palayanan publik ka nu leuwih hadé deui, sajalan jeung konsép smart city di Kota Sukabumi. Sala sahijna pangwangunan jeung paningkatan ajén jalan, sabagé urat nadi paékonomian jeung ajén hirup hiji daérah.

Saterusna dijelaskeun, status jalan kota di Kota Sukabumi ngahontal 149 ruas jalan anu panjangna 115,74 kilo méter pasagi. Tina jumlah éta ruas jeung panjang jalan téh, nu asup kana kondisi mantep ngahontal 98,68 kilo méter atawa 86,26 peresén.

Anapun masalah nu disanghareupan ku Pamaréntah Kota Sukabumi, nya éta réa kandaraan overload atawa kaleuwihan beban, saperti treuk nu ngakut keusik jeung nu lianna, sarta merlukeun ayana jalan alternatif di daérah kalér Sukabumi. Sedengkeun pikeun ngawujudkeun éta hal téh, Pamaréntah Kota Sukabumi kacida merlukeun ayana pahatian jeung pangrojong ti pamaréntah puseur, saperti pangrojong anggaran jeung nu lainna.

Leave a Reply