APARAT KAPULISIAN BARIS NINDAK TEGAS AKSI KAKERASAN Reporter : ARIF HIDAYAT

Reporter : ARIF HIDAYAT

Redaktur/Editor : ENDANG SUMARDI

Unsur Forkopimda (Forum Komunikasi Pimpinan Daérah) Kota Sukabumi katut sakumna SKPD (Satuan Kerja Parangkat Daérah) nu kaitannana jeung élemén masarakat, anyar-anyar ieu ngalaksanakeun Rakor (Rapat Kordinasi), ngabahas situasi kaamanan jeung katartiban masarakat di Kota Sukabumi, di Operation Room Setda Kota Sukabumi, sakaligus nyikepan kasus kakerasan anu dilaksanakeun ku géng motor sawatara waktu ka tukang.

Anapon nu hadir dina éta rakor téh, Wali Kota Sukabumi, H. Achmad Fahmi, Kapolres Sukabumi Kota, AKBP Wisnu Prabowo, Kasdim 0607 Kota Sukabumi, Mayor Chb. R. Khoirullah, pawakilan Kajaksaan Negri Sukabumi jeung Pangadilan Negri Sukabumi, para Kapala SKPD nu aya kaitannana, MUI (Majelis Ulama Indonésia) Kota Sukabumi, tokoh agama, pamuda, mahasiswa jeung masarakat. Dina éta rakor téh, dilaksanakeun panandatanganan déklarasi anti kakerasan di hareupeun Balé Kota Sukabumi.

Salian ti éta, dina éta rakor téh aya genep kasimpulan anu disaluyuan, kahiji aparat kapulisian baris nindak tegas aksi kakerasan utamana anu dilaksanakeun ku géng motor, kadua Ormas jeung élemén masarakat katut pamaréntah babarengan méré atikan jeung nyegah aksi kakerasan saperti géng motor, sarta katilu taki-taki sakaligus ngungkulan hoaks jeung provokasi di média sosial. Salajuna kaopat ngagunakeun téknologi saperti masang kaméra CCTV di satiap gapura atawa tempat karaméan, kalima satiap aya kajadian naon waé di wilayah kudu dilaporkeun ka apparat, jeung kagenep média massa diharepkeun nepikeun béwara atawa warta sacara wijak luyu jeung kaidah jurnalistik anu ditetepkeun.

Kapolres Sukabumi Kota, AKBP Wisnu Prabowo nandeskeun, pulisi baris nindak tegas dina mangsa aya aksi kakerasan anu ngancam warga. Saterusna ditandeskeun, nepi ka danget ieu geus dilaksanakeun upaya panyegahan, ku cara ngalaksanakeun patroli ka sajumlah tempat. Ka hareup pulisi baris ngaronjatkeun patroli, nya éta patroli gabungan jeung sakumna aparat kaamanan.

Leave a Reply