MASYARAKAT NU HAYANG MEUNANG PALAYANAN HARATIS DATANG WAÉ KANA ACARA PUNCAK MILANG KALA RADIO SWARA PERINTIS

Reporter/Redaktur/Editor : ENDANG SUMARDI

Asistén Paékonomian jeung Pangwangunan Setda Kota Sukabumi, Ir. H. Cécép Mansur, M.M., sakaligus sabagé PLT (Palaksana Tugas) Kapala Diskominfo (Dines Komunikasi jeung Informatika) Kota Sukabumi, cumeluk sakaligus ngagupay ka masarakat Kota Sukabumi jeung di sabudeureunnana nu hayang meunang palayanan haratis ti sababaraha SKPD (Satuan Kerja Parangkat Daérah) di lingkungan Pamaréntah Kota Sukabumi, datang waé kana Acara Puncak Milang Kala Ka 1 LPPL (Lembaga Panyiaran Publik Lokal) Radio Swara Perintis 93,1 FM Kota Sukabumi, poé Ahad, 23 Fébruari 2020, dina acara ranggeuyan Pangéling-ngéling Poé Jadi Ka 106 Kota Sukabumi.

Saterusna dijelaskeun, Milang Kala Ka 1 Radio Swara Perintis anu saméméhna dikenal RSPD (Radio Siaran Pamaréntah Daérah) Kota Sukabumi téh, ngangkat téma Sataun Awal Pajalanan. Sedengkeun Milang Kala Ka 1 Radio Swara Perintis téh, luyu jeung Perda (Peraturan Daérah) Kota Sukabumi Nomer 1 Taun 2019, Tanggal 11 Fébruari 2019, Ngeunaan Lembaga Panyiaran Publik Lokal Radio.

Anapon rupa-rupa kagiatan anu dilaksanakeun dina Acara Puncak Miang Kala Radio Swara Perintis téh, diantarana Lomba Panyiar di Command Centre Diskominfo Kota Sukabumi, sarta Panyalagaraan Palayanan Publik jeung Sosialisasi ti sababaraha SKPD jeung sponsor, pangbagian door prize, hiburan jeung games, di Buruan Balé Kota Sukabumi, ti pukul satengah 8 isuk nepi ka pukul 2 beurang WIB.

Salajuna jenis Palayanan Publik jeung Sosialisasi anu dilaksanakeun ku sababaraha SKPD dina Acara Puncak Miang Kala Radio Swara Perintis téh, diantarana Pamariksaan Kaséhatan Haratis Dines Kaséhatan, Palayanan Informasi Dunya Kerja Dines Tanaga Kerja, sarta Palayanan Sijempol (Siap Jemput Bola) Palayanan Nyieun Dokumén jeung Adminduk (Administrasi Kapadumukan) Disdukcapil (Dines Kapadumukan jeung Panyatetan Sipil) pikeun masarakat Kota Sukabumi. Lian ti éta ogé Palayanan Pamariksaan Kaséhatan Héwan Piaraan DKP3 (Dines Katahanan Pangan, Patanian jeung Paikanan), BPJS Kaséhatan jeung Katanagakerjaan, sarta SKPD jeung sababaraha pihak lianna.

Leave a Reply