WALI KOTA SUKABUMI MILON RAKORNAS INVÉSTASI TAUN 2020

Reporter/Redaktur/Editor : ENDANG SUMARDI

Wali Kota Sukabumi, H. Achmad Fahmi, dibarengan ku Sekertaris Daérah Kota Sukabumi, Drs. H. Dida Sembada, M.M., katut Kapala DPM-PTSP (Dines Pananeman Modal jeung Palayanan Terpadu Satu Pintu) Kota Sukabumi, Drs. Béni Haérani, M.M., milon Rakornas (Rapat Kordinasi Nasional) Invéstasi Taun 2020, di The Ritz Carlton Jakarta, anyar-anyar ieu. Ěta rakornas anu dicalagarakeun ku BKPM (Badan Kordinasi Pananeman Modal) RI jeung ngangkat téma Paningkatan Invéstasi pikeun Indonésia Maju téh, dibuka langsung ku Persidén RI, Joko Widodo.

Ěta rakornas téh diiluan ku para pamangku kapentingan atawa stake holder, ti mimiti réngréngan Mentri Kabinét Indonésia Maju, Gubernur, Bupati, Wali Kota, Sekertaris Daérah Provinsi, Sekertaris Daérah Kabupatén jeung Kota, nepi ka para Kapala DPM-PTSP jeung Administrator KĚK (Kawasan Ěkonomi Khusus).

Wali Kota Sukabumi ngajelaskeun, ieu rakornas téh dina raraga kordinasi jeung konsolidasi program jeung kagiatan pananeman modal, antara pamaréntah puseur jeung pamaréntah daérah. Ku sabab kitu, Wali Kota Sukabumi kacida ngarojong kana rupa-rupa hal anu dibahas jeung disaluyuan dina ieu rakornas, lantaran kacida hadéna. Saperti pangbahasan ngeunaan program pananeman modal antara pamaréntah puseur jeung pamaréntah daérah, anu maksud jeung tujuannana supaya aya pangaruhna kana paningkatan paékonomian jeung pamarataan invéstasi di daérah.

Saterusna dijelaskeun, ieu agénda taunan téh teu jadi ajang sérémonial deui, sabab dina taun ieu aya sababaraha agénda jeung kagiatan penting anu baris dilaksanakeun. Disagédéngeun ti éta ogé dijelaskeun, ieu rakornas invéstasi téh kacida pentingna, dina raraga upaya ngahangkeutkeun invéstasi, ngaliwatan harmonisasi kawijakan pamaréntah puseur jeung pamaréntah daérah. (Sumber Bagian Humas dan Protokol Setda Kota Sukabumi).

Leave a Reply