DPRD KABUPATÉN SUKAMARA NGALAKSANAKEUN KUNKER KA KOTA SUKABUMI

Reporter/Redaktur/Editor : ENDANG SUMARDI

DPRD Kabupatén Sukamara, Provinsi Kalimantan Tengah, ngalaksanakeun Kunker (Kunjungan Kerja) ka Kota Sukabumi, anyar-anyar ieu. Sedengkeun datangna rombongan anu dipingpin langsung ku Ketua DPRD Kabupatén Sukamara, Déni Khaidir téh, dibagéakeun  sakaligus ditarima sacara resmi ku Sekertaris Daérah Kota Sukabumi, Drs. H. Dida Sembada, M.M., di Rohangan Utama Balé Kota Sukabumi.

Sekertaris Daérah Kota Sukabumi kacida ngabagéakeunnana ka éta para Anggota DPRD téh, sabab dina raraga nguntun hubungan jeung silarurahmi, sakaligus tukeur pangalaman hususna nu aya kaitannana jeung pangalolaan palayanan publik, saperti dina widang kaséhatan jeung Pausahaan Daérah di Kota Sukabumi, anu diajén kacida hadéna.

Dina kasempetan éta, Sekertaris Daérah Kota Sukabumi ngajelaskeun sajumlah program unggulan Pamaréntah Kota Sukabumi dina widang kaséhatan, saperti Program Céték (Cukup ku KTP-él jeung KK) tatamba haratis di RSUD (Rumah Sakit Umum Daérah) Al-Mulk Kota Sukabumi, Homé Caré, Ambulans SIGAP (Siap jeung Ihlas Sagancangna Anteur Jemput Pasén) 24 Jam, Puskesmas Klinik Soré jeung Rumah Singgah di Bandung. Saterusna dijelaskeun, sajumlah éta program unggulan téh, dina raraga upaya méré jeung ngaronjatkeun palayanan anu hadé ka warga Kota Sukabumi.

Sedengkeun Ketua DPRD Kabupatén Sukamara, Déni Khaidir ngajelaskeun, pangalolaan rumah sakit di Kota Sukabumi diajén kacida hadéna sarta jadi panyumbang PAD (Pandapatan Asli Daérah). Salajuna ngajélaskeun, dilaksanakeunnana kunker ka Kota Sukabumi téh, dina raraga upaya ngagali sistim palayanan dina widang kaséhatan, pikeun diterapkeun sakaligus dironjatkeun jeung dimekarkeun di Kabupatén Sukamara. Komo deui RSUD R. Syamsudin, S.H. Kota Sukabumi mah, salian ti dijadikeun sala sahiji rumah sakit rujukan di Jawa Barat téh, ogé dijadikeun sala sahiji rumah sakit anu dipercaya pikeun ngungkulan kasus Corona.

Leave a Reply