SIAP NGARONJATKEUN KAWASPADAAN PANYEBARAN VIRUS CORONA

Reporter/Redaktur/Editor : ENDANG SUMARDI

Wali Kota Sukabumi, H. Achmad Fahmi nandaskeun, Pamaréntah Kota Sukabumi siap ngaronjatkeun kawaspadaan panyebaran virus Corona. Ěta panandesan téh ditepikeun basa milon vidéo conferénce antara Gubernur Jawa Barat katut Bupati sarta Wali Kota sa Jawa Barat, di Operation Room Balé Kota Sukabumi, sawatara waktu kaliwat.

Hadir dina kasempetan éta, Wakil Wali Kota, H. Andri S. Hamami, S.H., M.H., Sekertaris Daérah, Drs. H. Dida Sembada, M.M., Kapala Dines Kaséhatan, Diréktur RSUD (Rumah Sakit Umum Daerah) R. Syamsudin, S.H., Kapala Unsur Palaksana BPBD (Badan Pananggulangan Bencana Daérah), sarta Kapala Dines Pendidikan jeung Kabudayaan.

Wali Kota Sukabumi ngajelaskeun, Gubernur Jawa Barat meredih ka sakumna Kapala Daérah, sangkan ngaronjatkeun kawaspadaan panyebaran virus Corona. Salain ti éta, ogé ka masarakat sangkan ulah marudah, sarta pamaréntah ngajamin palayanan kaséhatan lumangsung lancar. Satuluyna ngajelaskeun, di Kota Sukabumi geus dilaksanakeun protokol kaséhatan, saperti tempat ibadah jeung lokasi lianna. Husus di lokasi pakantoran, boh pamaréntah boh swasta kudu nerapkeun protokol kaséhatan sacara maksimal, saperti nyadiakeun hand sanitizer atawa paragi ngabersihan leungeun jeung tempat ngumbah leungeun anu layak. Lian ti éta, para palajar ogé diajar di imah, cindekna ti tanggal 16 nepi ka tanggal 28 Maret 2020.

Sedengkeun ngeunaan panetepan jeung panerapan status siaga darurat Corona, dipasrahkun ka daérah masing-masing. Ngan pikeun Kota Sukabumi mah diajén masih aman jeung kondusip, tapi tetep ngaronjatkeun kawaspadan. Saterusna ngajelaskeun, dumasar kana data ti Dines Kaséhatan, nepi ka tanggal 16 Maret 2020, taya warga Kota Sukabumi anu ngabogaan status PDP (Pasén Dina Pangawasan). Ngan aya 30 warga anu asup ODP (Orang Dina Panalingaan), sarta sabagian gedé baris lulus dina panalingaan.

Leave a Reply