PANYALAGARAAN HÉLARAN SFF SA JAWA BARAT DITUNDA

Reporter/Redaktur/Editor : ENDANG SUMARDI

Kapala Disporapar (Dines Kapamudaan, Olahraga jeung Pariwisata) Kota Sukabumi, H. Adang Taufik, S.H., M.Si. nandeskeun, panyalagaraan Hélaran SFF (Sukabumi Folklore Féstival) atawa Pasanggiri Pawéy Seni Budaya Carita Rahayat sa Jawa Barat jeung Kacamatan sa Kota Sukabumi, kaasup 30 instansi pamaréntah jeung komunitas, ditunda nepi kana waktu anu baris dibéwarakeun salajuna.

Éta hélaran téh nurutkeun rarancang baris dilaksanakeun dina poé Saptu peuting, 28 Maret 2020, ti pukul 7 peuting nepi ka réngsé, dina raraga mapag jeung ngareuah-reuah Milang Kala  Poé Jadi Ka 106 Taun Kota Sukabumi, tanggal 1 April 2020. Saterusna ngajelaskeun, ditundana éta kagiatan téh, nindaklaju Surat Édaran Wali Kota Sukabumi Nomer 180/12/Huk, tanggal 16 Maret 2020, ngeunaan Paningkatan Kawaspadaan Panularan Inféksi Corona Virus Disease-19 atawa Covid-19.

Leuwih jauh ngajelaskeun, béwara ditundana éta kagiatan téh geus ditepikeun ka Sekertaris Daérah Kota Sukabumi, Sekertaris DPRD Kota Sukabumi, Inspéktorat Kota Sukabumi, para Kapala Badan jeung Dines, Kantor Kesbangpol (Kesatuan Bangsa jeung Politik) Kota Sukabumi, Diréktur RSUD (Rumah Sakit Umum Daérah) R. Syamsudin, S.H. Kota Sukabumi jeung Camat sa Kota Sukabumi, ngaliwatan Surat Disporapar Kota Sukabumi Nomer 556/190/Disporapar/2020, tanggal 17 Maret 2020, ngeunaan Panundaan Kagiatan Hélaran SFF Tahun 2020. Éta surat téh tembusannana ditepikeun ka Wali Kota katut Wakil Wali Kota Sukabumi, sarta Asistén Administrasi Setda Kota Sukabumi, salaku Pupuhu Panata Calagara Milang Kala Poé Jadi Ka 106 Taun Kota Sukabumi.

Lian ti éta, Kapala Disporapar Kota Sukabumi neda pangampura ka sakumna pihak jeung sakumna lapisan masarakat, ku ditundana éta kagiatan nepi ka waktu anu baris dibéwarakeun deui.

Leave a Reply