SAJUMLAH 150 RÉLAWAN PARAWAT NGALAKSANAKEUN SOSIALISASI PANYEGAHAN VIRUS CORONA

Reporter/Redaktur/Editor : ENDANG SUMARDI

Sajumlah 150 rélawan parawat ti PPNI (Pasatuan Parawat Nasional Indonésia) Kota Sukabumi, ngalaksanakeun sosialisasi jeung édukasi panyegahan virus Corona ka masarakat. Ka 150 éta rélawan  téh, dilepas ku Wali Kota Sukabumi, H. Achmad Fahmi, katut Ketua PPNI Kota Sukabumi, Irawan Danismaya, di Dines Kaséhatan Kota Sukabumi, sawatara poé katukang.

Wali Kota Sukabumi dina biantarana ngajelaskeun, ieu kagiatan téh sabagé bentuk pangabdian para parawat ka masarakat, dina raraga  miéling Tepung Taun Ka 46 PPNI, cindekna tanggal 17 Maret 2020. Saterusna ngajelaskeun, tangtangan nu disanghareupan dina danget ieu, nya éta ngatik jeung méré béwara ka masarakat sacara tepat jeung cepet ngeunaan virus Corona. Lantaran alam dunya kaasup Indonésia, keur nyanghareupan pandemi Corona.

Ku sabab kitu, Wali Kota kalayan asmana Pamaréntah Kota Sukabumi, ngahaturkeun nuhun katut pangajén anu saluhur-luhurna ka para parawat ti PPNI, anu ngalaksanakeun sosialisasi jeung édukasi panyegahan virus Corona ka masarakat. Salian ti éta, Wali Kota meredih ka para parawat, sangkan dina ngajalankeun éta tugas téh dilengkepan ku standar kaséhatan anu maksimum, saperti ngagunakeun masker jeung alat kaséhatan lianna.

Sedengkeun Ketua PPNI Kota Sukabumi, Irawan Danismaya ngajelaskeun, aya 5 titik nu jadi targét dina éta sosialisasi jeung édukasi téh. Diantarana Kalurahan Gedong Panjang jeung Kalurahan Tipar Kacamatan Citamiang, sarta Panti Asuhan. Saterusna ngajelaskeun, dina nepikeun sosialisasi jeung édukasi téh, dilaksanakeun sacara door to door ka satiap imah masarakat.

Leave a Reply