APARAT WILAYAH SANGKAN TERUS USAHA NYEGAH PANYEBARAN VIRUS CORONA

Reporter/Redaktur/Editor : ENDANG SUMARDI

Wali Kota Sukabumi, H. Achmad Fahmi, mingpin Télé Confrén atawa Vidéo Confrén Pananganan Panyebaran Virus Corona atawa Covid-19, jeung para Camat katut Lurah sa Kota Sukabumi, anyar-anyar ieu, di Rohangan Tata Pamaréntahan Setda Kota Sukabumi. Hadir dina kasempetan éta, Sekertaris Daérah Kota Sukabumi, Drs. H. Dida Sembada, M.M., PLT (Palaksana Tugas) Kapala Dines Kaséhatan Kota Sukabumi, dr. Hj. Rita Fitrianingsih, M.Kes., Diréktur RSUD (Rumah Sakit Umum Daérah) R. Syamsudin, S.H. Kota Sukabumi, dr. H. Bahrul Anwar, MKM., sarta para pajabat nu aya kaitannana.

Dina éta kasempetan, Wali Kota Sukabumi meredih ka Aparat Wilayah Kacamatan jeung Kalurahan sarta Parangkat RW jeung RT, sangkan  ngaronjatkeun kasiapsiagaan jeung terus usaha nyegah panyebaran Virus Corona. Salian ti éta, Wali Kota ogé ngajelaskeun ngeunaan Pangbentukan Kalurahan Kréatif Siaga Covid-19, pikeun nyegah jeung megatkeun mata ranté panyebaran Virus Corona. Salajuna meredih ka para Camat jeung Lurah, sangkan ngalaksanakeun sosialisasi jeung nepikeun béwara ngeunaan panyegahan panyebaran Virus Corona ka masarakat, sarta sangkan salawasna ngaptipkeun WA (Whats-app) Grup RW jeung RT. Disagédéngeun ti éta, ogé ngalaksanakeun pametaan wilayah anu can disemprot disinféktan, pikeun dilaksanakeun panyemprotan.

Anu teu éléh penting, para Camat jeung Lurah ogé sangkan ngaptipkeun Sistim Kaamanan Warga 1 kali 24 Jam, hususna dina hal nalingakeun jalma nu asup ka wewengkonna masing-masing. Ulah nepi ka aya jalma anu teu wawuh asup ka wewengkonna, tanpa aya panalingaan jeung pamariksaan kaséhatannana, hususna ngeunaan Virus Corona. Disagigireun ti éta, Pamaréntah Kota Sukabumi ogé ngaptipkeun sistim informasi kaséhatan warga, sarta nalingakeun kaséhatan warga ti imah ka imah, pikeun nyegah panyebaran Virus Corona.

One Response

  1. Mulyadi 27 Maret, 2020 Reply

Leave a Reply