PAMARÉNTAH KOTA SUKABUMI NYADIAKEUN MÉDIA CÉNTER COVID-19

Reporter/Redaktur/Editor : ENDANG SUMARDI

Pamaréntah Kota Sukabumi nyadiakeun pusat informasi jeung kordinasi atawa média cénter Covid-19 atawa Corona, di Dines Kaséhatan Kota Sukabumi. Ěta Pusat Informasi téh diresmikeun ku Wali Kota Sukabumi, H. Achmad Fahmi, anyar-anyar ieu. Hadir dina éta kesempetan, Sekertaris Daérah, Drs. H. Dida Sembada, M.M., PLT (Palaksana Tugas) Kapala Dines Kaséhatan, dr. Hj. Rita Fitrianingsih, M.Kes., para pajabat nu aya tumalina, sarta para jurnalis, boh média citak boh éléktronik jeung online.

Dina kasempetan éta, Wali Kota ngajelaskeun, Pamaréntah Kota Sukabumi geus ngabogaan sarana, pikeun ngagampangkeun masarakat dina ngalaksanakeun panyegahan panyebaran virus Corona, nya éta salian ti call cénter ogé média cénter Covid-19. Salajuna ngajelaskeun, diayakeunnana média cénter téh nya éta pikeun ngajawab patanyaan ti para wartawan jeung masarakat, kana ngeunaan béwara kasus Corona pang anyarna dina satiap pukul 12 beurang dina saban poéna, sarta data anu ditepikeun baris leuwih cepet jeung akurat. Disagigireun ti éta, ogé pikeun ngungkulan ayana béwara hoaks, anu can tangtu bener henteuna.

Lian ti éta ogé ngajelaskeun, PDP (Pasén Dengan Pangawasan) jeung ODP (Orang Dengan Pamantowan) Corona, diungkulan sacara maksimal. Satuluyna, patugas baris terus néangan masarakat anu ngabogaan poténsi keuna ku Corona, supaya upaya-upaya salajuna gampang dilaksanakeunnana. Disagédéngeun ti éta ogé ngajelaskeun, kasus Corona geus ditetepkeun sabagé bencana kaséhatan nasional.

Saterusna ngajelaskeun, Pamaréntah Kota Sukabumi baris ngupayakeun ngungkulan Corona sacara maksimal. Diantarana ku ngalaksanakeun simulasi kasus PDP dipuseurkeun di sala sahiji RS (Rumah Sakit). Sabab nepi ka danget ieu masih sumebar di sajumlah RS, saperti RSUD (Rumah Sakit Umum Daérah) R. Syamsudin, S.H. Kota Sukabumi, jeung RS Secapa Polri Sukabumi. Maksud jeung tujuannana, supaya babari dina ngalaksanakeun pangawasannana.

Leave a Reply