PAMARÉNTAH KOTA SUKABUMI MEUNANG BANTUAN PIKEUN NYEGAH PANYEBARAN COVID-19

Reporter : ARIF HIDAYAT

Redaktur/Editor : ENDANG SUMARDI

Pamaréntah Kota Sukabumi, meunang bantuan disinféktan chamber ti Bank Mandiri, 2 wastafel portabel ti Bank BRI, jeung 1.500 masker ti PT Gréat Apparel, pikeun nyegah panyebaran Corona Virus Diséasé 19 atawa Covid-19. Ěta bantuan téh ditarima ku Wakil Wali Kota Sukabumi, H. Andri S. Hamami, dina Poé Jadi Ka 106 Taun Kota Sukabumi, 1 April 2020, di Balé Kota Sukabumi.

Dina kasempetan éta, Wakil Wali Kota Sukabumi kalayan asmana Pamaréntah Kota Sukabumi, ngahaturkeun nuhun ka Bank Mandiri, Bank BRI jeung PT Gréat Apparel, anu geus méré bantuan disinféktan chamber, wastafel portabel jeung masker, pikeun nyegah panyebaran Covid-19. Lantaran dina ngungkulan jeung nyegah panyebaran Covid-19 téh, ngabutuhkeun pangrojong jeung bantuan sarta gawé bareng ti sakumna pihak.

Lian ti éta, Wakil Wali Kota ogé ngawilujengkeun miéling Poé Jadi Ka 106 Taun Kota Sukabumi, ka sakumna Aparat Pamaréntah, TNI, Polri, BUMN jeung BUMD, katut lembaga jeung pausahaan sarta sakumna lapisan masyarakat Kota Sukabumi.

Salajuna Wakil Wali Kota umajak ka sakumna pihak, sangkan terus usaha jeung sabilulungan ngamajukeun Kota Sukabumi dina sagala widang, sarta ngaréngsékeun satiap pasualan nu aya di Kota Sukabumi, diantarana nyegah panyebaran Covid-19. Sala sahijina ku cara ngalaksanakeun PHBS (Prilaku Hirup Bersih jeung Séhat), sarta ngabiasakeun jeung ngabudayakeun ngumbah leungeun maké sabun atawa antiséptik séjén dina cai anu ngalir.

Leave a Reply