DISKOP UKM-PP KOTA SUKABUMI NGABAGIKEUN MASKER HARATIS KA PARA PADAGANG DI 4 PASAR

Reporter : ARIF HIDAYAT

Redaktur/Editor : ENDANG SUMARDI

Pamaréntah Kota Sukabumi terus usaha ngalaksanakeun rupa-rupa tarékah jeung upaya, pijeun nyegah panyebaran virus covid-19, diantarana ku cara nerapkeun protokol kaséhatan maksimum, di sakumna instansi pamaréntah jeung tempat-tempat nu jadi puseur kagiatan masarakat, saperti pasar jeung nu séjénna.

Salian ti éta, Pamaréntah Kota Sukabumi ngaliwatan Diskop UKM-PP (Dines Koprasi, Usaha Kecil Menengah, Padagangan jeung Paindustrian) Kota Sukabumi, anyar-anyar ieu, ngabagikeun masker haratis ka para padagang di 4 pasar.

PLT (Palaksana Tugas) Kapala Diskop UKM-PP Kota Sukabumi, Drs. H. Didin Syarifudin, M.Si. ngajelaskeun, éta masker haratis téh dibagikeun ka para padagang nu aya di 4 pasar Kota Sukabumi, anu ngawengku ti Pasar Déwi Sartika, Pasar Degung, Pasar Tipar jeung Pasar Lembursitu.

Anapon jumlah masker anu dibagikeun ka para padagang nu aya di éta 4 pasar téh, sagemblengna ngahontal 4.500 masker. Sedengkeun panyadiaan éta masker téh, ngarupakeun hasil gawé bareng jeung Bagian Paékonomian, Pangwangunan jeung Kerja Sama Daérah Setda Kota Sukabumi.

Dina éta kasempetan, PLT Kapala Diskop UKM-PP Kota Sukabumi cumeluk ka para padagang nu aya di éta 4 pasar, sangkan salaswasna maké masker sacara hadé, pikeun nyingkahan jeung nyegah panyebaran virus covid-19.

Disagigireun ti éta, para padagang dina mangsa ngalayanan anu balanja, sangkan ngajaga jarak aman minimal saméter, sarta kudu remen ngumbah leungeun maké sabun atawa antiséptik séjén dina cai anu ngalir, atawa ngagunakeun hand sanitizer.

Leave a Reply