INOVASI TOMBOL BISA POLRES SUKABUMI KOTA ASUP TOP 99 INOVASI PALAYANAN PUBLIK TINGKAT NASIONAL TAUN 2017

Reporter : ENDANG SUMARDI

Salian ti Inovasi Program CĚTĚK (Cukup Ě-KTP jeung Kartu Kulawarga) Palayanan Haratis di RSUD (Rumah Sakit Umum Daérah) AL-Mulk Kota Sukabumi pikeun warga masarakat Kota Sukabumi, sabagé sala sahiji inovasi Pamaréntah Kota Sukabumi dina méré jeung ngaronjatkeun palayanan publik hususna dina widang kaséhatan asup Top 99 Inovasi Palayanan Publik Tingkat Nasional Taun 2017, Inovasi Program Tombol BISA (Briliant, Inovatif, Speed, Acountable jeung Panic Botton) Polres Sukabumi Kota, anu dilaunching dina taun 2016 kaliwat, ogé asup Top 99 Inovasi Palayanan Publik Tingkat Nasional Taun 2017, anu ditetepkeun ku KemenPAN-RB (Kementrian Pandayagunaan Aparatur Nagara jeung Réformasi Birokrasi) RI.

Kapolres Sukabumi Kota, AKBP Rustam Mansur, S.Ik. ngajelaskeun, Inovasi Program Tombol BISA Polres Sukabumi Kota téh, pikeun ngaréspon sacara gancang laporan anu ditepikeun ku warga masyarakat, hususna dina ngungkulan rupa-rupa tindak kajahatan di wilayah hukum Polres Sukabumi Kota.

Ku asupna Inovasi Program Tombol BISA Polres Sukabumi Kota kana Top 99 Inovasi Palayanan Publik Tingkat Nasional Taun 2017 téh, Kapolres Sukabumi Kota ngarasa reueus jeung dan gumbira. Lantaran ti 20 Kamentrian, 3 Lembaga, 21 Propinsi, 34 Kabupatén, 15 Kota, 2 BUMN jeung 4 BUMD anu kapilih asup Top 99 téh, ngan ukur 2 Polres sa Indonésia, nya éta Polres Sukabumi Kota ngawakilan Polda Jabar jeung Polres Brebes ngawakilan Polda Jateng, sarta meunang kahormatan pikeun jadi Top 40, sabagé Inovasi Palayanan Publik pang hadéna taun 2017.

Sedengkeun pikeun asup Top 40 Inovasi Palayanan Publik pang hadéna taun 2017 téh, Kapolres Sukabumi Kota geus nepikeun preséntasi katut wawancara jeung Tim Panél Independen, di KemenPAN-RB RI. Tah kulantaran kitu, Kapolres Sukabumi Kota ngaharepkeun, Inovasi Program Tombol BISA Polres Sukabumi Kota téh, bisa asup Top 40 Inovasi Palayanan Publik pang hadéna taun 2017.

Kapolres Sukabumi Kota nandeskeun, ku meunangna éta prestasi téh, ngarupakeun sala sahiji bukti nyata, yén Polres Sukabumi Kota bener-bener jeung salawasna fokus méré sakaligus ngaronjatkeun palayanan anu hadé ka warga masarakat, lain ngan saukur sawates ngungkulan rupa-rupa tindak kajahatan wungkul, tapi ogé mayungan jeung nangtayungan warga masarakat, hususna di wilayah hukum Polres Sukabumi Kota.

Salajuna ditandeskeun, Inovasi Program Tombol BISA téh, ngarupakeun sala sahiji Inovasi Polres Sukabumi Kota, dina raraga usaha miara sakaligus ngaronjatkeun situasi Kamtibmas (Kaamanan jeung Katartiban Masarakat), di wilayah hukum Polres Sukabumi Kota. Sabab ngaliwatan Inovasi Program Tombol BISA téh, Aparat Polres Sukabumi Kota bisa sagancangna datang ka TKP (Tempat Kajadian Perkara), anu pamustungannana situasi Kamtibmas jeung Gangguan Kamtibmas di wilayah hukum Polres Sukabumi Kota bisa sagancangna diungkulan.

Kapolres Sukabumi Kota ngajéntrékeun, Tombol BISA téh ngarupakeun sala sahiji barang mangrupa kalung, tombol méja jeung smartphone android, anu bisa sagancangna méré nyaho ka Aparat Polres Sukabumi Kota, kana tempat jeung kajadian di wilayah hukum Polres Sukabumi Kota. Disagigireun ti éta ogé dijéntrékeun, Tombol BISA téh kakara dipasang di sababaraha tempat anu penting pisan, saperti bank, puseur balanja jeung di sababaraha tempat karaméan séjénna, di wilayah hukum Polres Sukabumi Kota.