PAMARÉNTAH KOTA SUKABUMI GEUS MASRAHKEUN BANTUAN STIMULANT P2RW TAUN 2017

Reporter : ENDANG SUMARDI

Pamaréntah Kota Sukabumi, geus masrahkeun bantuan stimulant P2RW (Program Pemberdayaan Rukun Warga) Taun 2017, anu gedéna ngahontal Rp. 6.282.500,00, nya éta Rp. 6.035.000.000,00 ka 355 RW anu sumebar di 33 kalurahan jeung 7 kacamatan sa Kota Sukabumi, atawa masing-masing RW gedéna Rp. 17.000.000,00, sarta ka Panata Calagara P2RW pang hadéna taun 2016 di satiap tingkat kalurahan, nya éta mangrupa tambahan bantuan stimulant P2RW Taun 2017masing-masing gedéna Rp. 5.500.000,00, nya éta ka juara kahiji gedéna Rp. 3.500.000,00, jeung ka juara kadua gedéna Rp. 2.000.000,00. Salajuna ka Panata Calagara P2RW pang hadéna taun 2016 di satiap tingkat kacamatan masing-masing gedéna Rp. 7.500.000,00, nya éta ka juara kahiji gedéna Rp. 5.000.000,00, jeung ka juara kadua gedéna Rp. 2.500.000,00, sarta ka Panata Calagara P2RW pang hadéna taun 2016 di tingkat Kota Sukabumi gedéna Rp. 13.500.000,00, nya éta ka juara kahiji gedéna Rp. 6.000.000,00, ka juara kadua gedéna Rp. 4.500.000,00, jeung ka juara katilu gedéna Rp. 3.000.000,00.

Ěta bantuan téh dipasrahkeun sacara simbolis ku Walikota Sukabumi, H. Mohamad Muraz, S.H., M.M., dibarengan ku Sekertaris Daérah Kota Sukabumi, Dr. H.M.N. Hanafie Zain, M.Si., Asistén Pamaréntahan Setda Kota Sukabumi, Drs. H. Andri Setiawan, M.M., jeung Kapala Bagian Tapem (Tata Pamaréntahan) Setda Kota Sukabumi, Punjul Saépul Hayat, S.STP., M.Si., dina acara audénsi jeung sakumna Ketua RW katut LPM (Lembaga Pemberdayaan Masarakat) sa Kota Sukabumi, cindekna tanggal 30 April 2017, di Lapangan Sutadi Rono Dipuro Setukpa Lemdiklat Polri Sukabumi. Hadir dina kasempetan éta, Unsur Forkopimda (Forum Komunikasi Pimpinan Daérah), para Asistén Daérah katut Staf Ahli Walikota Sukabumi, para Kapala OPD (Organisasi Parangkat Daérah), para Camat jeung Lurah, sarta alim ulama, inohong masarakat jeung para tamu ondangan séjénna.

Dina biantarana Walikota Sukabumi ngajelaskeun, P2RW téh ngarupakeun program bantuan stimulan anu dipasrahkeun ku Pamaréntah Kota Sukabumi, ka satiap RW di Kota Sukabumi, pikeun ngabantu waragad pangwangunan anu dilaksanakeun di satiap RW. Salian ti éta, ogé pikeun ngatik warga masarakat, supaya bisa diajar ngararancang, ngalaksanakeun, niténan jeung nalingakeun palaksanaan, nanggungjawabkeun, ngaoprasikeun jeung miara kana rupa-rupa hasil pangwangunan, anu geus dilaksanakeun di satiap RW di Kota Sukabumi.

Disagigireun ti éta, Walikota Sukabumi ogé cumeluk ka para Ketua RW sa Kota Sukabumi anu can nyokot éta bantuan, supaya sagancangna masrahkeun proposal anu geus divérifikasi ku Tim Pangamping Téhnis, luyu jeung Juknis (Petunjuk Téhnis) katut aturan anu ditetepkeun, sangkan pangwangunan anu diwaragadan tina bantuan stimulant P2RW téh bisa sagancangna dilaksanakeun jeung bisa ditanggungjawabkeun, luyu jeung prosedur anu ditetepkeun, nya éta ngutamakeun pangwangunan kabutuhan sarana dasar warga masarakat.

Dina kasempetan éta, Walikota Sukabumi ngajak ngobrol sarta tanya jawab jeung para Ketua RW katut LPM, hususna anu aya kaitannana jeung rupa-rupa masalah sarta program Pamaréntah Kota Sukabumi, kaasup tanggapan jeung kamandang ti para Ketua RW katut LPM sarta para tamu ondangan séjénna, utamana ngeunaan rarancang diayakeunnana Pasar Maréma Taun 1438 Hijriyah di jalan Harun Kabir  Kota Sukabumi. Hasilna nya éta sabagian gedé Ketua RW katut LPM sarta para tamu ondangan séjénna, teu nyaluyuan diayakeunnana Pasar Maréma, hususna di Jalan Harun Kabir Kota Sukabumi. Saréngséna ngobrol sarta tanya jawab jeung para Ketua RW katut LPM sarta para tamu ondangan séjénna, Walikota Sukabumi katut rombongan, ngadongdon sakaligus niténan palaksanaan Lomba Burung Berkicau Walikota Sukabumi Cup Taun 2017, anu dilaksanakeun di Lapangan Sutadi Rono Dipuro Setukpa Lemdiklat Polri Sukabumi.